३. तिकउद्देसो

९. तयो पुग्गला –

(१) निरासो, आसंसो, विगतासो.

(२) तयो गिलानूपमा पुग्गला.

(३) कायसक्खी, दिट्ठिप्पत्तो, सद्धाविमुत्तो.

(४) गूथभाणी, पुप्फभाणी, मधुभाणी.

(५) अरुकूपमचित्तो पुग्गलो, विज्जूपमचित्तो पुग्गलो, वजिरूपमचित्तो पुग्गलो.

(६) अन्धो, एकचक्खु, द्विचक्खु.

(७) अवकुज्जपञ्ञो पुग्गलो, उच्छङ्गपञ्ञो [उच्चङ्गुपञ्ञो (स्या.)] पुग्गलो, पुथुपञ्ञो पुग्गलो.

(८) अत्थेकच्चो पुग्गलो कामेसु च भवेसु च अवीतरागो, अत्थेकच्चो पुग्गलो कामेसु वीतरागो भवेसु अवीतरागो, अत्थेकच्चो पुग्गलो कामेसु च भवेसु च वीतरागो.

(९) पासाणलेखूपमो पुग्गलो, पथविलेखूपमो पुग्गलो, उदकलेखूपमो पुग्गलो.

(१०) तयो पोत्थकूपमा पुग्गला.

(११) तयो कासिकवत्थूपमा पुग्गला.

(१२) सुप्पमेय्यो, दुप्पमेय्यो, अप्पमेय्यो.

(१३) अत्थेकच्चो पुग्गलो न सेवितब्बो न भजितब्बो न पयिरुपासितब्बो, अत्थेकच्चो पुग्गलो सेवितब्बो भजितब्बो पयिरुपासितब्बो, अत्थेकच्चो पुग्गलो सक्कत्वा गरुं कत्वा [गरुकत्वा (सी.)] सेवितब्बो भजितब्बो पयिरुपासितब्बो.

(१४) अत्थेकच्चो पुग्गलो जिगुच्छितब्बो न सेवितब्बो न भजितब्बो न पयिरुपासितब्बो, अत्थेकच्चो पुग्गलो अज्झुपेक्खितब्बो न सेवितब्बो न भजितब्बो न पयिरुपासितब्बो; अत्थेकच्चो पुग्गलो सेवितब्बो भजितब्बो पयिरुपासितब्बो.

(१५) अत्थेकच्चो पुग्गलो सीलेसु परिपूरकारी [परिपूरीकारी (स्या.)], समाधिस्मिं मत्तसो कारी, पञ्ञाय मत्तसो कारी; अत्थेकच्चो पुग्गलो सीलेसु च परिपूरकारी, समाधिस्मिञ्च परिपूरकारी, पञ्ञाय मत्तसो कारी; अत्थेकच्चो पुग्गलो सीलेसु च परिपूरकारी, समाधिस्मिञ्च परिपूरकारी, पञ्ञाय च परिपूरकारी.

(१६) तयो सत्थारो.

(१७) अपरेपि तयो सत्थारो.

तिकं.