१. पच्चयानुलोमं

हेतुपच्चयो

३९. सेक्खं धम्मं पटिच्च नसेक्खो धम्मो उप्पज्जति हेतुपच्चया. सेक्खं धम्मं पटिच्च नअसेक्खो धम्मो उप्पज्जति हेतुपच्चया. सेक्खं धम्मं पटिच्च ननेवसेक्खनासेक्खो धम्मो उप्पज्जति हेतुपच्चया. सेक्खं धम्मं पटिच्च नअसेक्खो च ननेवसेक्खनासेक्खो च धम्मा उप्पज्जन्ति हेतुपच्चया. सेक्खं धम्मं पटिच्च नसेक्खो च नअसेक्खो च धम्मा उप्पज्जन्ति हेतुपच्चया. (५)

असेक्खं धम्मं पटिच्च नअसेक्खो धम्मो उप्पज्जति हेतुपच्चया. असेक्खं धम्मं पटिच्च नसेक्खो धम्मो उप्पज्जति हेतुपच्चया. असेक्खं धम्मं पटिच्च ननेवसेक्खनासेक्खो धम्मो उप्पज्जति हेतुपच्चया. असेक्खं धम्मं पटिच्च नसेक्खो च ननेवसेक्खनासेक्खो च धम्मा उप्पज्जन्ति हेतुपच्चया. असेक्खं धम्मं पटिच्च नसेक्खो च नअसेक्खो च धम्मा उप्पज्जन्ति हेतुपच्चया. (५)

नेवसेक्खनासेक्खं धम्मं पटिच्च नसेक्खो धम्मो उप्पज्जति हेतुपच्चया. नेवसेक्खनासेक्खं धम्मं पटिच्च नअसेक्खो धम्मो उप्पज्जति हेतुपच्चया. नेवसेक्खनासेक्खं धम्मं पटिच्च नसेक्खो च नअसेक्खो च धम्मा उप्पज्जन्ति हेतुपच्चया. (३)

सेक्खञ्च नेवसेक्खनासेक्खञ्च धम्मं पटिच्च नसेक्खो धम्मो उप्पज्जति हेतुपच्चया. सेक्खञ्च नेवसेक्खनासेक्खञ्च धम्मं पटिच्च नअसेक्खो धम्मो उप्पज्जति हेतुपच्चया. सेक्खञ्च नेवसेक्खनासेक्खञ्च धम्मं पटिच्च नसेक्खो च नअसेक्खो च धम्मा उप्पज्जन्ति हेतुपच्चया. (३)

असेक्खञ्च नेवसेक्खनासेक्खञ्च धम्मं पटिच्च नसेक्खो धम्मो उप्पज्जति हेतुपच्चया. असेक्खञ्च नेवसेक्खनासेक्खञ्च धम्मं पटिच्च नअसेक्खो धम्मो उप्पज्जति हेतुपच्चया. असेक्खञ्च नेवसेक्खनासेक्खञ्च धम्मं पटिच्च नसेक्खो च नअसेक्खो च धम्मा उप्पज्जन्ति हेतुपच्चया. (३) (संखित्तं.)

हेतुया एकूनवीस. (सब्बत्थ वित्थारो.)