१. पच्चयानुलोमं

हेतुपच्चयो

३५. पीतिसहगतं धम्मं पटिच्च नपीतिसहगतो धम्मो उप्पज्जति हेतुपच्चया. पीतिसहगतं धम्मं पटिच्च नसुखसहगतो धम्मो उप्पज्जति हेतुपच्चया. पीतिसहगतं धम्मं पटिच्च नउपेक्खासहगतो धम्मो उप्पज्जति हेतुपच्चया. पीतिसहगतं धम्मं पटिच्च नपीतिसहगतो च नउपेक्खासहगतो च धम्मा उप्पज्जन्ति हेतुपच्चया. पीतिसहगतं धम्मं पटिच्च नसुखसहगतो च नउपेक्खासहगतो च धम्मा उप्पज्जन्ति हेतुपच्चया. पीतिसहगतं धम्मं पटिच्च नपीतिसहगतो च नसुखसहगतो च धम्मा उप्पज्जन्ति हेतुपच्चया. पीतिसहगतं धम्मं पटिच्च नपीतिसहगतो च नसुखसहगतो च नउपेक्खासहगतो च धम्मा उप्पज्जन्ति हेतुपच्चया. (७)

सुखसहगतं धम्मं पटिच्च नसुखसहगतो धम्मो उप्पज्जति हेतुपच्चया…पे… सत्त.

उपेक्खासहगतं धम्मं पटिच्च नउपेक्खासहगतो धम्मो उप्पज्जति हेतुपच्चया…पे… सत्त.

पीतिसहगतञ्च सुखसहगतञ्च धम्मं पटिच्च नपीतिसहगतो धम्मो उप्पज्जति हेतुपच्चया…पे… सत्त. (संखित्तं.)

हेतुया अट्ठवीस, आरम्मणे चतुवीस…पे… अविगते अट्ठवीस.

(सहजातवारम्पि…पे… सम्पयुत्तवारम्पि पञ्हावारम्पि सब्बत्थ वित्थारेतब्बं).