१. पच्चयानुलोमं

हेतुपच्चयो

३३. सवितक्कसविचारं धम्मं पटिच्च नसवितक्कसविचारो धम्मो उप्पज्जति हेतुपच्चया. सवितक्कसविचारं धम्मं पटिच्च नअवितक्कविचारमत्तो धम्मो उप्पज्जति हेतुपच्चया. सवितक्कसविचारं धम्मं पटिच्च नअवितक्कअविचारो धम्मो उप्पज्जति हेतुपच्चया. सवितक्कसविचारं धम्मं पटिच्च नसवितक्कसविचारो च नअवितक्कअविचारो च धम्मा उप्पज्जन्ति हेतुपच्चया. सवितक्कसविचारं धम्मं पटिच्च नअवितक्कविचारमत्तो च नअवितक्कअविचारो च धम्मा उप्पज्जन्ति हेतुपच्चया. सवितक्कसविचारं धम्मं पटिच्च नसवितक्कसविचारो च नअवितक्कविचारमत्तो च धम्मा उप्पज्जन्ति हेतुपच्चया. सवितक्कसविचारं धम्मं पटिच्च नसवितक्कसविचारो च नअवितक्कविचारमत्तो च नअवितक्कअविचारो च धम्मा उप्पज्जन्ति हेतुपच्चया. (७)

३४. अवितक्कविचारमत्तं धम्मं पटिच्च नअवितक्कविचारमत्तो धम्मो उप्पज्जति हेतुपच्चया. अवितक्कविचारमत्तं धम्मं पटिच्च नसवितक्कसविचारो धम्मो उप्पज्जति हेतुपच्चया. अवितक्कविचारमत्तं धम्मं पटिच्च नअवितक्कअविचारो धम्मो उप्पज्जति हेतुपच्चया. अवितक्कविचारमत्तं धम्मं पटिच्च नसवितक्कसविचारो च नअवितक्कअविचारो च धम्मा उप्पज्जन्ति हेतुपच्चया. अवितक्कविचारमत्तं धम्मं पटिच्च नअवितक्कविचारमत्तो च नअवितक्कअविचारो च धम्मा उप्पज्जन्ति हेतुपच्चया. अवितक्कविचारमत्तं धम्मं पटिच्च नसवितक्कसविचारो च नअवितक्कविचारमत्तो च धम्मा उप्पज्जन्ति हेतुपच्चया. अवितक्कविचारमत्तं धम्मं पटिच्च नसवितक्कसविचारो च नअवितक्कविचारमत्तो च नअवितक्कअविचारो च धम्मा उप्पज्जन्ति हेतुपच्चया. (७)

अवितक्कअविचारं धम्मं पटिच्च नअवितक्कअविचारो धम्मो उप्पज्जति हेतुपच्चया…पे… सत्त.

सवितक्कसविचारञ्च अवितक्कअविचारञ्च धम्मं पटिच्च नसवितक्कसविचारो धम्मो उप्पज्जति हेतुपच्चया…पे… सत्त.

अवितक्कविचारमत्तञ्च अवितक्कअविचारञ्च धम्मं पटिच्च नसवितक्कसविचारो धम्मो उप्पज्जति हेतुपच्चया…पे… सत्त.

सवितक्कसविचारञ्च अवितक्कविचारमत्तञ्च धम्मं पटिच्च नसवितक्कसविचारो धम्मो उप्पज्जति हेतुपच्चया…पे… सत्त.

सवितक्कसविचारञ्च अवितक्कविचारमत्तञ्च अवितक्कअविचारञ्च धम्मं पटिच्च नसवितक्कसविचारो धम्मो उप्पज्जति हेतुपच्चया…पे… सत्त. (संखित्तं.)

हेतुया एकूनपञ्ञास, आरम्मणे एकूनपञ्ञास…पे… अविगते एकूनपञ्ञास. (सहजातवारम्पि…पे… पञ्हावारम्पि वित्थारेतब्बं.)