१००-७. सरणदुक-चूळन्तरदुकं

६७. नसरणो नसप्पच्चयो धम्मो अरणस्स सप्पच्चयस्स धम्मस्स आरम्मणपच्चयेन पच्चयो. आरम्मणे एकं.

६८. नसरणो नसङ्खतो धम्मो… (संखित्तं).

६९. नसरणं नसनिदस्सनं धम्मं पटिच्च अरणो सनिदस्सनो धम्मो उप्पज्जति हेतुपच्चया… हेतुया तीणि.

नसरणो नअनिदस्सनो धम्मो सरणस्स अनिदस्सनस्स धम्मस्स आरम्मणपच्चयेन पच्चयो. नसरणो नअनिदस्सनो धम्मो अरणस्स अनिदस्सनस्स धम्मस्स आरम्मणपच्चयेन पच्चयो. आरम्मणे द्वे.

७०. नसरणं नसप्पटिघं धम्मं पटिच्च अरणो सप्पटिघो धम्मो उप्पज्जति हेतुपच्चया… हेतुया तीणि.

७१. नसरणं नरूपिं धम्मं पटिच्च अरणो रूपी धम्मो उप्पज्जति हेतुपच्चया. नअरणं नरूपिं धम्मं पटिच्च अरणो रूपी धम्मो उप्पज्जति हेतुपच्चया. हेतुया द्वे.

नसरणं नअरूपिं धम्मं पच्चया सरणो अरूपी धम्मो उप्पज्जति हेतुपच्चया. नसरणं नअरूपिं धम्मं पच्चया अरणो अरूपी धम्मो उप्पज्जति हेतुपच्चया. हेतुया द्वे.

७२. नसरणं नलोकियं धम्मं पटिच्च अरणो लोकियो धम्मो उप्पज्जति हेतुपच्चया. हेतुया एकं.

नसरणं नलोकुत्तरं धम्मं पच्चया अरणो लोकुत्तरो धम्मो उप्पज्जति हेतुपच्चया. हेतुया एकं.

७३. नसरणं नकेनचि विञ्ञेय्यं धम्मं पटिच्च अरणो केनचि विञ्ञेय्यो धम्मो उप्पज्जति हेतुपच्चया… हेतुया पञ्च.

नसरणं नकेनचि नविञ्ञेय्यं धम्मं पटिच्च अरणो केनचि नविञ्ञेय्यो धम्मो उप्पज्जति हेतुपच्चया… हेतुया पञ्च.