२-१. वेदनात्तिक-कुसलत्तिकं

२७. नसुखाय वेदनाय सम्पयुत्तं नकुसलं धम्मं पच्चया सुखाय वेदनाय सम्पयुत्तो कुसलो धम्मो उप्पज्जति हेतुपच्चया. नसुखाय वेदनाय सम्पयुत्तं नकुसलं धम्मं पच्चया अदुक्खमसुखाय वेदनाय सम्पयुत्तो कुसलो धम्मो उप्पज्जति हेतुपच्चया. द्वे.

नदुक्खाय वेदनाय सम्पयुत्तं नकुसलं धम्मं पच्चया सुखाय वेदनाय सम्पयुत्तो कुसलो धम्मो उप्पज्जति हेतुपच्चया. नदुक्खाय वेदनाय सम्पयुत्तं नकुसलं धम्मं पच्चया अदुक्खमसुखाय वेदनाय सम्पयुत्तो कुसलो धम्मो उप्पज्जति हेतुपच्चया. द्वे.

नअदुक्खमसुखाय वेदनाय सम्पयुत्तं नकुसलं धम्मं पच्चया अदुक्खमसुखाय वेदनाय सम्पयुत्तो कुसलो धम्मो उप्पज्जति हेतुपच्चया. नअदुक्खमसुखाय वेदनाय सम्पयुत्तं नकुसलं धम्मं पच्चया सुखाय वेदनाय सम्पयुत्तो कुसलो धम्मो उप्पज्जति हेतुपच्चया. द्वे. (चत्तारि गणितकेन द्वे द्वे पञ्हा कातब्बा.) हेतुया चुद्दस.

२८. नसुखाय वेदनाय सम्पयुत्तं नअकुसलं धम्मं पच्चया सुखाय वेदनाय सम्पयुत्तो अकुसलो धम्मो उप्पज्जति हेतुपच्चया. नसुखाय वेदनाय सम्पयुत्तं नअकुसलं धम्मं पच्चया दुक्खाय वेदनाय सम्पयुत्तो अकुसलो धम्मो उप्पज्जति हेतुपच्चया. हेतुया एकवीस.

२९. नसुखाय वेदनाय सम्पयुत्तो नअब्याकतो धम्मो सुखाय वेदनाय सम्पयुत्तस्स अब्याकतस्स धम्मस्स आरम्मणपच्चयेन पच्चयो… आरम्मणे चुद्दस.