१-१९-२०. कुसलत्तिक-अज्झत्तत्तिकद्वयं

२३. नकुसलो नअज्झत्तो धम्मो अज्झत्तस्स कुसलस्स धम्मस्स आरम्मणपच्चयेन पच्चयो. (संखित्तं.) आरम्मणे अट्ठारस, अधिपतिया सोळस, उपनिस्सये अट्ठारस, पुरेजाते अत्थिया अविगते नव.

नकुसलो नबहिद्धा धम्मो बहिद्धा कुसलस्स धम्मस्स आरम्मणपच्चयेन पच्चयो. (संखित्तं.) आरम्मणे अट्ठारस, अधिपतिया छ, उपनिस्सये अट्ठारस, पुरेजाते अत्थिया अविगते नव.

२४. नकुसलं नअज्झत्तारम्मणं धम्मं पटिच्च अब्याकतो अज्झत्तारम्मणो धम्मो उप्पज्जति हेतुपच्चया… हेतुया तीणि.

नकुसलं नबहिद्धारम्मणं धम्मं पटिच्च अब्याकतो बहिद्धारम्मणो धम्मो उप्पज्जति हेतुपच्चया… हेतुया तीणि.