२२-१४-१९. सनिदस्सनत्तिक-आसवगोच्छकानि

६९. नसनिदस्सनसप्पटिघं नोआसवं धम्मं पटिच्च अनिदस्सनअप्पटिघो आसवो धम्मो उप्पज्जति हेतुपच्चया… हेतुया तीणि.

नसनिदस्सनसप्पटिघं ननोआसवं धम्मं पटिच्च सनिदस्सनसप्पटिघो नोआसवो धम्मो उप्पज्जति हेतुपच्चया… हेतुया एकवीस.

७०. नसनिदस्सनसप्पटिघं नसासवं धम्मं पटिच्च सनिदस्सनसप्पटिघो सासवो धम्मो उप्पज्जति हेतुपच्चया… हेतुया एकवीस.

नसनिदस्सनसप्पटिघं नअनासवं धम्मं पच्चया अनिदस्सनअप्पटिघो अनासवो धम्मो उप्पज्जति हेतुपच्चया. (संखित्तं.) हेतुया तीणि…पे… अविगते तीणि.

७१. नसनिदस्सनसप्पटिघं नआसवसम्पयुत्तं धम्मं पटिच्च अनिदस्सनअप्पटिघो आसवसम्पयुत्तो धम्मो उप्पज्जति हेतुपच्चया… हेतुया तीणि.

नसनिदस्सनसप्पटिघं नआसवविप्पयुत्तं धम्मं पटिच्च सनिदस्सनसप्पटिघो आसवविप्पयुत्तो धम्मो उप्पज्जति हेतुपच्चया… हेतुया एकवीस.

७२. नसनिदस्सनसप्पटिघं नआसवञ्चेव नअनासवञ्च धम्मं पटिच्च अनिदस्सनअप्पटिघो आसवो चेव सासवो च धम्मो उप्पज्जति हेतुपच्चया… हेतुया तीणि.

नसनिदस्सनसप्पटिघं नअनासवञ्चेव ननो च आसवं धम्मं पटिच्च सनिदस्सनसप्पटिघो सासवो चेव नो च आसवो धम्मो उप्पज्जति हेतुपच्चया… हेतुया एकवीस.

७३. नसनिदस्सनसप्पटिघं नआसवञ्चेव नआसवविप्पयुत्तञ्च धम्मं पटिच्च अनिदस्सनअप्पटिघो आसवो चेव आसवसम्पयुत्तो च धम्मो उप्पज्जति हेतुपच्चया… हेतुया तीणि.

नसनिदस्सनसप्पटिघं नआसवविप्पयुत्तञ्चेव ननो च आसवं धम्मं पटिच्च अनिदस्सनअप्पटिघो आसवसम्पयुत्तो चेव नो च आसवो धम्मो उप्पज्जति हेतुपच्चया… हेतुया तीणि.

७४. नसनिदस्सनसप्पटिघं आसवविप्पयुत्तं नसासवं धम्मं पटिच्च सनिदस्सनसप्पटिघो आसवविप्पयुत्तो सासवो धम्मो उप्पज्जति हेतुपच्चया… हेतुया एकवीस.

नसनिदस्सनसप्पटिघं आसवविप्पयुत्तं नअनासवं धम्मं पच्चया अनिदस्सनअप्पटिघो आसवविप्पयुत्तो अनासवो धम्मो उप्पज्जति हेतुपच्चया… हेतुया तीणि.