१-२. कुसलत्तिक-सहेतुकदुकं

३. नकुसलं नसहेतुकं धम्मं पटिच्च अकुसलो सहेतुको धम्मो उप्पज्जति हेतुपच्चया. नकुसलं नसहेतुकं धम्मं पटिच्च अब्याकतो सहेतुको धम्मो उप्पज्जति हेतुपच्चया. नअकुसलं नसहेतुकं धम्मं पटिच्च अब्याकतो सहेतुको धम्मो उप्पज्जति हेतुपच्चया. नअब्याकतं नसहेतुकं धम्मं पटिच्च अकुसलो सहेतुको धम्मो उप्पज्जति हेतुपच्चया. नकुसलं नसहेतुकञ्च नअब्याकतं नसहेतुकञ्च धम्मं पटिच्च अकुसलो सहेतुको धम्मो उप्पज्जति हेतुपच्चया. नकुसलं नसहेतुकञ्च नअकुसलं नसहेतुकञ्च धम्मं पटिच्च अब्याकतो सहेतुको धम्मो उप्पज्जति हेतुपच्चया. हेतुया छ.

४. नकुसलं नअहेतुकं धम्मं पटिच्च अब्याकतो अहेतुको धम्मो उप्पज्जति हेतुपच्चया. नअकुसलं नअहेतुकं धम्मं पटिच्च अब्याकतो अहेतुको धम्मो उप्पज्जति हेतुपच्चया. नअब्याकतं नअहेतुकं धम्मं पटिच्च अब्याकतो अहेतुको धम्मो उप्पज्जति हेतुपच्चया. नकुसलं नअहेतुकञ्च नअब्याकतं नअहेतुकञ्च धम्मं पटिच्च अब्याकतो अहेतुको धम्मो उप्पज्जति हेतुपच्चया. नअकुसलं नअहेतुकञ्च नअब्याकतं नअहेतुकञ्च धम्मं पटिच्च अब्याकतो अहेतुको धम्मो उप्पज्जति हेतुपच्चया. नकुसलं नअहेतुकञ्च नअकुसलं नअहेतुकञ्च धम्मं पटिच्च अब्याकतो अहेतुको धम्मो उप्पज्जति हेतुपच्चया. हेतुया छ.