२. वेदनात्तिकं

१-७. पटिच्चवारादि

१०. नसुखाय वेदनाय सम्पयुत्तं धम्मं पटिच्च सुखाय वेदनाय सम्पयुत्तो धम्मो उप्पज्जति हेतुपच्चया. नसुखाय वेदनाय सम्पयुत्तं धम्मं पटिच्च दुक्खाय वेदनाय सम्पयुत्तो धम्मो उप्पज्जति हेतुपच्चया. नसुखाय वेदनाय सम्पयुत्तं धम्मं पटिच्च अदुक्खमसुखाय वेदनाय सम्पयुत्तो धम्मो उप्पज्जति हेतुपच्चया. (३)

नदुक्खाय वेदनाय सम्पयुत्तं धम्मं पटिच्च दुक्खाय वेदनाय सम्पयुत्तो धम्मो उप्पज्जति हेतुपच्चया. नदुक्खाय वेदनाय सम्पयुत्तं धम्मं पटिच्च सुखाय वेदनाय सम्पयुत्तो धम्मो उप्पज्जति हेतुपच्चया. नदुक्खाय वेदनाय सम्पयुत्तं धम्मं पटिच्च अदुक्खमसुखाय वेदनाय सम्पयुत्तो धम्मो उप्पज्जति हेतुपच्चया. (३)

नअदुक्खमसुखाय वेदनाय सम्पयुत्तं धम्मं पटिच्च अदुक्खमसुखाय वेदनाय सम्पयुत्तो धम्मो उप्पज्जति हेतुपच्चया. नअदुक्खमसुखाय वेदनाय सम्पयुत्तं धम्मं पटिच्च सुखाय वेदनाय सम्पयुत्तो धम्मो उप्पज्जति हेतुपच्चया. नअदुक्खमसुखाय वेदनाय सम्पयुत्तं धम्मं पटिच्च दुक्खाय वेदनाय सम्पयुत्तो धम्मो उप्पज्जति हेतुपच्चया. (३) (संखित्तं.) हेतुया एकवीस, अधिपतिया एकवीस…पे… अविगते एकवीस.