१८-१९. अतीतत्तिकद्वयं

१-७. पटिच्चवारादि

२६. नअतीतो धम्मो पच्चुप्पन्नस्स धम्मस्स हेतुपच्चयेन पच्चयो. नअनागतो धम्मो पच्चुप्पन्नस्स धम्मस्स हेतुपच्चयेन पच्चयो. नअतीतो च नअनागतो च धम्मा पच्चुप्पन्नस्स धम्मस्स हेतुपच्चयेन पच्चयो. हेतुया तीणि.

२७. नअतीतारम्मणं धम्मं पटिच्च अतीतारम्मणो धम्मो उप्पज्जति हेतुपच्चया. नअतीतारम्मणं धम्मं पटिच्च अनागतारम्मणो धम्मो उप्पज्जति हेतुपच्चया. नअतीतारम्मणं धम्मं पटिच्च पच्चुप्पन्नारम्मणो धम्मो उप्पज्जति हेतुपच्चया. तीणि.

नअनागतारम्मणं धम्मं पटिच्च अतीतारम्मणो धम्मो उप्पज्जति हेतुपच्चया. नअनागतारम्मणं धम्मं पटिच्च पच्चुप्पन्नारम्मणो धम्मो उप्पज्जति हेतुपच्चया. द्वे.

नपच्चुप्पन्नारम्मणं धम्मं पटिच्च पच्चुप्पन्नारम्मणो धम्मो उप्पज्जति हेतुपच्चया. नपच्चुप्पन्नारम्मणं धम्मं पटिच्च अतीतारम्मणो धम्मो उप्पज्जति हेतुपच्चया. नपच्चुप्पन्नारम्मणं धम्मं पटिच्च अनागतारम्मणो धम्मो उप्पज्जति हेतुपच्चया. तीणि. (संखित्तं.) हेतुया सत्तरस.