१-८२-९८. हेतुदुक-दस्सनेनपहातब्बदुकादि

३८. हेतुं दस्सनेन पहातब्बं धम्मं पटिच्च नहेतु नदस्सनेन पहातब्बो धम्मो उप्पज्जति हेतुपच्चया… हेतुया तीणि.

नहेतुं नदस्सनेन पहातब्बं धम्मं पच्चया ननहेतु ननदस्सनेन पहातब्बो धम्मो उप्पज्जति हेतुपच्चया… तीणिमेव.

३९. हेतुं दस्सनेन पहातब्बहेतुकं धम्मं पटिच्च नहेतु नदस्सनेन पहातब्बहेतुको धम्मो उप्पज्जति हेतुपच्चया… हेतुया तीणि.

नहेतुं नदस्सनेन पहातब्बहेतुकं धम्मं पटिच्च ननहेतु ननदस्सनेन पहातब्बहेतुको धम्मो उप्पज्जति हेतुपच्चया… हेतुया एकं.