१-६. कुसलत्तिक-हेतुसहेतुकदुकं

१५. कुसलं नहेतुं सहेतुकं धम्मं पटिच्च नकुसलो नहेतु नसहेतुको धम्मो उप्पज्जति हेतुपच्चया. कुसलं नहेतुं सहेतुकं धम्मं पटिच्च नअकुसलो नहेतु नसहेतुको धम्मो उप्पज्जति हेतुपच्चया. कुसलं नहेतुं सहेतुकं धम्मं पटिच्च नकुसलो नहेतु नसहेतुको च नअकुसलो नहेतु नसहेतुको च धम्मा उप्पज्जन्ति हेतुपच्चया. तीणि.

अकुसलं नहेतुं सहेतुकं… तीणि.

अब्याकतं नहेतुं सहेतुकं धम्मं पटिच्च नकुसलो…पे… नअकुसलो…पे… नकुसलो नहेतु नसहेतुको च नअकुसलो नहेतु नसहेतुको च धम्मा उप्पज्जन्ति हेतुपच्चया… तीणि.

१६. अब्याकतं नहेतुं अहेतुकं धम्मं पटिच्च नकुसलो नहेतु नअहेतुको धम्मो उप्पज्जति हेतुपच्चया. अब्याकतं नहेतुं अहेतुकं धम्मं पटिच्च नअकुसलो नहेतु नअहेतुको धम्मो उप्पज्जति हेतुपच्चया. अब्याकतं नहेतुं अहेतुकं धम्मं पटिच्च नकुसलो नहेतु नअहेतुको च नअकुसलो नहेतु नअहेतुको च धम्मा उप्पज्जन्ति हेतुपच्चया. (३)

हेतुगोच्छकं निट्ठितं.