१-१४-१९. कुसलत्तिक-आसवगोच्छकं

२४. अकुसलं आसवं धम्मं पटिच्च नअकुसलो नआसवो धम्मो…पे… नकुसलो नआसवो धम्मो…पे… नअब्याकतो नआसवो धम्मो…पे… नकुसलो नआसवो च नअब्याकतो नआसवो च धम्मा…पे… नकुसलो नआसवो च नअकुसलो नआसवो च धम्मा उप्पज्जन्ति हेतुपच्चया. हेतुया पञ्च, आरम्मणे तीणि…पे… अविगते पञ्च.

अकुसलं नोआसवं धम्मं पटिच्च नकुसलो ननोआसवो धम्मो उप्पज्जति हेतुपच्चया. अकुसलं नोआसवं धम्मं पटिच्च नअब्याकतो ननोआसवो धम्मो…पे… नकुसलो ननोआसवो च नअब्याकतो ननोआसवो च धम्मा उप्पज्जन्ति हेतुपच्चया. हेतुया तीणि…पे… अविगते तीणि.

२५. अब्याकतं सासवं धम्मं पटिच्च…पे… (लोकियदुकसदिसं).

२६. अकुसलं आसवसम्पयुत्तं धम्मं पटिच्च नअकुसलो नआसवसम्पयुत्तो धम्मो …पे… नकुसलो नआसवसम्पयुत्तो धम्मो…पे… नअब्याकतो नआसवसम्पयुत्तो धम्मो…पे… नकुसलो नआसवसम्पयुत्तो च नअब्याकतो नआसवसम्पयुत्तो च धम्मा…पे… नकुसलो नआसवसम्पयुत्तो च नअकुसलो नआसवसम्पयुत्तो च धम्मा उप्पज्जन्ति हेतुपच्चया. हेतुया पञ्च.

अकुसलं आसवविप्पयुत्तं धम्मं पटिच्च नकुसलो नआसवविप्पयुत्तो धम्मो…पे… नअब्याकतो नआसवविप्पयुत्तो धम्मो…पे… नकुसलो नआसवविप्पयुत्तो च नअब्याकतो नआसवविप्पयुत्तो च धम्मा उप्पज्जन्ति हेतुपच्चया. हेतुया तीणि.

२७. अकुसलं आसवञ्चेव सासवञ्च धम्मं पटिच्च नअकुसलो नआसवो चेव नअनासवो च धम्मो…पे… नकुसलो नआसवो चेव नअनासवो च धम्मो…पे… नअब्याकतो नआसवो चेव नअनासवो च धम्मो…पे… नकुसलो नआसवो चेव नअनासवो च नअब्याकतो नआसवो चेव नअनासवो च धम्मा…पे… नकुसलो नआसवो चेव नअनासवो च नअकुसलो नआसवो चेव नअनासवो च धम्मा उप्पज्जन्ति हेतुपच्चया. हेतुया पञ्च.

अकुसलं सासवञ्चेव नो च आसवं धम्मं पटिच्च नअकुसलो नअनासवो चेव ननो च आसवो धम्मो…पे… नअब्याकतो नअनासवो चेव ननो च आसवो धम्मो…पे… नकुसलो नअनासवो चेव ननो च आसवो नअब्याकतो नअनासवो चेव ननो आसवो च धम्मा उप्पज्जन्ति हेतुपच्चया. हेतुया तीणि.

२८. अकुसलं आसवञ्चेव आसवसम्पयुत्तञ्च धम्मं पटिच्च नकुसलो नआसवो चेव नआसवविप्पयुत्तो च धम्मो…पे… नअब्याकतो नआसवो चेव नआसवविप्पयुत्तो च धम्मो…पे… नकुसलो नआसवो चेव नआसवविप्पयुत्तो च नअब्याकतो नआसवो चेव नआसवविप्पयुत्तो च धम्मा उप्पज्जन्ति हेतुपच्चया. हेतुया तीणि.

अकुसलं आसवसम्पयुत्तञ्चेव नो च आसवं धम्मं पटिच्च नकुसलो नआसवविप्पयुत्तो चेव ननो च आसवो धम्मो…पे… नअब्याकतो नआसवविप्पयुत्तो चेव ननो च आसवो धम्मो …पे… नकुसलो नआसवविप्पयुत्तो चेव ननोआसवो च नअब्याकतो नआसवविप्पयुत्तो चेव ननो च आसवो च धम्मा उप्पज्जन्ति हेतुपच्चया. हेतुया तीणि.

२९. अब्याकतं आसवविप्पयुत्तं सासवं धम्मं पटिच्च…पे… (लोकियदुकसदिसं).