१००-१. सरणदुक-कुसलत्तिकं

७९. अरणं कुसलं धम्मं पटिच्च नसरणो नकुसलो धम्मो उप्पज्जति हेतुपच्चया. हेतुया एकं.

सरणं अकुसलं धम्मं पटिच्च नसरणो नअकुसलो धम्मो उप्पज्जति हेतुपच्चया. हेतुया एकं.

अरणं अब्याकतं धम्मं पच्चया नअरणो नअब्याकतो धम्मो उप्पज्जति हेतुपच्चया. अरणं अब्याकतं धम्मं पच्चया नसरणो नअब्याकतो धम्मो उप्पज्जति हेतुपच्चया. हेतुया द्वे. (सहजातवारम्पि…पे… सम्पयुत्तवारम्पि पटिच्चवारसदिसं.)

८०. अरणो अब्याकतो धम्मो नअरणस्स नअब्याकतस्स धम्मस्स आरम्मणपच्चयेन पच्चयो. अरणो अब्याकतो धम्मो नसरणस्स नअब्याकतस्स धम्मस्स आरम्मणपच्चयेन पच्चयो. (२)

आरम्मणे द्वे…पे… अविगते द्वे.