१-२१. हेतुदुक-सनिदस्सनत्तिकं

२९. नहेतु सनिदस्सनसप्पटिघो धम्मो ननहेतुस्स नसनिदस्सनसप्पटिघस्स धम्मस्स आरम्मणपच्चयेन पच्चयो…पे… नहेतु सनिदस्सनसप्पटिघो धम्मो नहेतुस्स नसनिदस्सनसप्पटिघस्स च ननहेतुस्स नसनिदस्सनसप्पटिघस्स च धम्मस्स आरम्मणपच्चयेन पच्चयो. आरम्मणे तीणि, अधिपतिया उपनिस्सये पुरेजाते अत्थिया अविगते तीणि.

नहेतुं अनिदस्सनसप्पटिघं धम्मं पटिच्च नहेतु नअनिदस्सनसप्पटिघो धम्मो उप्पज्जति हेतुपच्चया. हेतुया एकं…पे… अविगते एकं.

हेतुं अनिदस्सनअप्पटिघं धम्मं पटिच्च नहेतु नअनिदस्सनअप्पटिघो धम्मो उप्पज्जति हेतुपच्चया. नहेतुं अनिदस्सनअप्पटिघं धम्मं पटिच्च नहेतु नअनिदस्सनअप्पटिघो धम्मो उप्पज्जति हेतुपच्चया. हेतुं अनिदस्सनअप्पटिघञ्च नहेतुं अनिदस्सनअप्पटिघञ्च धम्मं पटिच्च नहेतु नअनिदस्सनअप्पटिघो धम्मो उप्पज्जति हेतुपच्चया. (३) हेतुया तीणि.