१-७. पटिच्चवारादि

७. हेतुञ्चेव हेतुसम्पयुत्तञ्च धम्मं पटिच्च नहेतु चेव नहेतुविप्पयुत्तो च धम्मो उप्पज्जति हेतुपच्चया. हेतुञ्चेव हेतुसम्पयुत्तञ्च धम्मं पटिच्च नहेतुविप्पयुत्तो चेव ननहेतु च धम्मो उप्पज्जति हेतुपच्चया. हेतुञ्चेव हेतुसम्पयुत्तञ्च धम्मं पटिच्च नहेतु चेव नहेतुविप्पयुत्तो च नहेतुविप्पयुत्तो चेव ननहेतु च धम्मा उप्पज्जन्ति हेतुपच्चया. (३)

हेतुसम्पयुत्तञ्चेव न च हेतुं धम्मं पटिच्च नहेतुविप्पयुत्तो चेव ननहेतु च धम्मो उप्पज्जति हेतुपच्चया. हेतुसम्पयुत्तञ्चेव न च हेतुं धम्मं पटिच्च नहेतु चेव नहेतुविप्पयुत्तो च धम्मो उप्पज्जति हेतुपच्चया. हेतुसम्पयुत्तञ्चेव न च हेतुं धम्मं पटिच्च नहेतु चेव नहेतुविप्पयुत्तो च नहेतुविप्पयुत्तो चेव ननहेतु च धम्मा उप्पज्जन्ति हेतुपच्चया. (३)

हेतुञ्चेव हेतुसम्पयुत्तञ्च हेतुसम्पयुत्तञ्चेव न च हेतुञ्च धम्मं पटिच्च नहेतु चेव नहेतुविप्पयुत्तो च धम्मो उप्पज्जति हेतुपच्चया. हेतुञ्चेव हेतुसम्पयुत्तञ्च हेतुसम्पयुत्तञ्चेव न च हेतुञ्च धम्मं पटिच्च नहेतुविप्पयुत्तो चेव ननहेतु धम्मो च उप्पज्जति हेतुपच्चया. हेतुञ्चेव हेतुसम्पयुत्तञ्च हेतुसम्पयुत्तञ्चेव न च हेतुञ्च धम्मं पटिच्च नहेतु चेव नहेतुविप्पयुत्तो च नहेतुविप्पयुत्तो चेव ननहेतु च धम्मा उप्पज्जन्ति हेतुपच्चया. (३) (संखित्तं.)

हेतुया नव. (सहजातवारम्पि…पे… पञ्हावारम्पि वित्थारेतब्बं.)