१-७. पटिच्चवारादि

४. सहेतुकं धम्मं पटिच्च नसहेतुको धम्मो उप्पज्जति हेतुपच्चया. सहेतुकं धम्मं पटिच्च नअहेतुको धम्मो उप्पज्जति हेतुपच्चया. सहेतुकं धम्मं पटिच्च नसहेतुको च नअहेतुको च धम्मा उप्पज्जन्ति हेतुपच्चया. (३)

अहेतुकं धम्मं पटिच्च नअहेतुको धम्मो उप्पज्जति हेतुपच्चया. अहेतुकं धम्मं पटिच्च नसहेतुको धम्मो उप्पज्जति हेतुपच्चया. अहेतुकं धम्मं पटिच्च नसहेतुको च नअहेतुको च धम्मा उप्पज्जन्ति हेतुपच्चया. (३)

सहेतुकञ्च अहेतुकञ्च धम्मं पटिच्च नसहेतुको धम्मो उप्पज्जति हेतुपच्चया. सहेतुकञ्च अहेतुकञ्च धम्मं पटिच्च नअहेतुको धम्मो उप्पज्जति हेतुपच्चया. सहेतुकञ्च अहेतुकञ्च धम्मं पटिच्च नसहेतुको च नअहेतुको च धम्मा उप्पज्जन्ति हेतुपच्चया. (३) (संखित्तं.)

हेतुया नव, आरम्मणे छ…पे… अविगते नव. (सहजातवारम्पि…पे… पञ्हावारम्पि वित्थारेतब्बं.)