१. पच्चयानुलोमं

हेतुपच्चयो

१. हेतुं धम्मं पटिच्च नहेतु धम्मो उप्पज्जति हेतुपच्चया – हेतुं धम्मं पटिच्च सम्पयुत्तका खन्धा चित्तसमुट्ठानञ्च रूपं; पटिसन्धिक्खणे…पे… हेतुं धम्मं पटिच्च ननहेतु धम्मो उप्पज्जति हेतुपच्चया. हेतुं धम्मं पटिच्च नहेतु च ननहेतु च धम्मा उप्पज्जन्ति हेतुपच्चया. (३)

नहेतुं धम्मं पटिच्च ननहेतु धम्मो उप्पज्जति हेतुपच्चया. नहेतुं धम्मं पटिच्च नहेतु धम्मो उप्पज्जति हेतुपच्चया. नहेतुं धम्मं पटिच्च नहेतु च ननहेतु च धम्मा उप्पज्जन्ति हेतुपच्चया. (३)

हेतुञ्च नहेतुञ्च धम्मं पटिच्च नहेतु धम्मो उप्पज्जति हेतुपच्चया. हेतुञ्च नहेतुञ्च धम्मं पटिच्च ननहेतु धम्मो उप्पज्जति हेतुपच्चया. हेतुञ्च नहेतुञ्च धम्मं पटिच्च नहेतु च ननहेतु च धम्मा उप्पज्जन्ति हेतुपच्चया. (३) (संखित्तं.)

हेतुया नव, आरम्मणे नव…पे… अविगते नव. (सहजातवारम्पि…पे… सम्पयुत्तवारम्पि पटिच्चवारसदिसं.)

हेतु-आरम्मणपच्चया

२. हेतु धम्मो नहेतुस्स धम्मस्स हेतुपच्चयेन पच्चयो… तीणि.

हेतु धम्मो नहेतुस्स धम्मस्स आरम्मणपच्चयेन पच्चयो… तीणि.

नहेतु धम्मो ननहेतुस्स धम्मस्स आरम्मणपच्चयेन पच्चयो… तीणि.

हेतु च नहेतु च धम्मा नहेतुस्स धम्मस्स आरम्मणपच्चयेन पच्चयो… तीणि. (संखित्तं.)

३. हेतुया तीणि, आरम्मणे नव…पे… अविगते नव. (पञ्हावारम्पि एवं वित्थारेतब्बं.)