१-७. पटिच्चवारादि

२६. चेतसिकं धम्मं पटिच्च नचेतसिको धम्मो उप्पज्जति हेतुपच्चया.

२७. चित्तसम्पयुत्तं धम्मं पटिच्च नचित्तसम्पयुत्तो धम्मो उप्पज्जति हेतुपच्चया…पे….

चित्तसंसट्ठं धम्मं पटिच्च नचित्तसंसट्ठो धम्मो उप्पज्जति हेतुपच्चया.

२८. चित्तसमुट्ठानं धम्मं पटिच्च नचित्तसमुट्ठानो धम्मो उप्पज्जति हेतुपच्चया.

२९. चित्तसहभुं धम्मं पटिच्च नचित्तसहभू धम्मो उप्पज्जति हेतुपच्चया…पे… चित्तानुपरिवत्तिं धम्मं पटिच्च नचित्तानुपरिवत्ती धम्मो उप्पज्जति हेतुपच्चया…पे… चित्तसंसट्ठसमुट्ठानं धम्मं पटिच्च नचित्तसंसट्ठसमुट्ठानो धम्मो उप्पज्जति हेतुपच्चया…पे… चित्तसंसट्ठसमुट्ठानसहभुं धम्मं पटिच्च नचित्तसंसट्ठसमुट्ठानसहभू धम्मो उप्पज्जति हेतुपच्चया…पे… चित्तसंसट्ठसमुट्ठानानुपरिवत्तिं धम्मं पटिच्च नचित्तसंसट्ठसमुट्ठानानुपरिवत्ती धम्मो उप्पज्जति हेतुपच्चया.

३०. अज्झत्तिकं धम्मं पटिच्च नअज्झत्तिको धम्मो उप्पज्जति हेतुपच्चया… तीणि.

बाहिरं धम्मं पटिच्च नबाहिरो धम्मो उप्पज्जति हेतुपच्चया… तीणि.

अज्झत्तिकञ्च बाहिरञ्च धम्मं पटिच्च नअज्झत्तिको धम्मो उप्पज्जति हेतुपच्चया… तीणि.

३१. उपादा धम्मं पटिच्च नोउपादा धम्मो उप्पज्जति हेतुपच्चया. (१)

नोउपादा धम्मं पटिच्च ननोउपादा धम्मो उप्पज्जति हेतुपच्चया… तीणि.

उपादा च नोउपादा च धम्मं पटिच्च नोउपादा धम्मो उप्पज्जति हेतुपच्चया. (१)

३२. उपादिन्नं धम्मं पटिच्च नउपादिन्नो धम्मो उप्पज्जति हेतुपच्चया… तीणि.

अनुपादिन्नं धम्मं पटिच्च नअनुपादिन्नो धम्मो उप्पज्जति हेतुपच्चया. (१)

उपादिन्नञ्च अनुपादिन्नञ्च धम्मं पटिच्च नउपादिन्नो धम्मो उप्पज्जति हेतुपच्चया. (१) (संखित्तं.)

हेतुया पञ्च…पे… अविगते पञ्च. (सब्बत्थ वित्थारो.)

महन्तरदुकं निट्ठितं.