१७. आसवसासवदुकं

१-७. पटिच्चवारादि

१९. आसवञ्चेव सासवञ्च धम्मं पटिच्च नआसवो चेव नअनासवो च धम्मो उप्पज्जति हेतुपच्चया. आसवञ्चेव सासवञ्च धम्मं पटिच्च नअनासवो चेव ननो च आसवो धम्मो उप्पज्जति हेतुपच्चया. आसवञ्चेव सासवञ्च धम्मं पटिच्च नआसवो चेव नअनासवो च नअनासवो चेव ननो च आसवो च धम्मा उप्पज्जन्ति हेतुपच्चया. (३)

सासवञ्चेव नो च आसवं धम्मं पटिच्च नअनासवो चेव ननो च आसवो धम्मो उप्पज्जति हेतुपच्चया… तीणि.

आसवञ्चेव सासवञ्च सासवञ्चेव नो च आसवञ्च धम्मं पटिच्च नआसवो चेव नअनासवो च धम्मो उप्पज्जति हेतुपच्चया… तीणि. हेतुया नव. (सब्बत्थ नव.)