१-७. पटिच्चवारादि

हेतुपच्चयो

११०. परित्तं कुसलं धम्मं पटिच्च परित्तो कुसलो धम्मो उप्पज्जति हेतुपच्चया. (१)

महग्गतं कुसलं धम्मं पटिच्च महग्गतो कुसलो धम्मो उप्पज्जति हेतुपच्चया. (१)

अप्पमाणं कुसलं धम्मं पटिच्च अप्पमाणो कुसलो धम्मो उप्पज्जति हेतुपच्चया. (१) (सब्बत्थ तीणि. सब्बत्थ वित्थारो.)

१११. परित्तं अकुसलं धम्मं पटिच्च परित्तो अकुसलो धम्मो उप्पज्जति हेतुपच्चया. (सब्बत्थ एकं.)

परित्तं अब्याकतं धम्मं पटिच्च परित्तो अब्याकतो धम्मो उप्पज्जति हेतुपच्चया… तीणि.

महग्गतं अब्याकतं धम्मं पटिच्च महग्गतो अब्याकतो धम्मो उप्पज्जति हेतुपच्चया… तीणि.

अप्पमाणं अब्याकतं धम्मं पटिच्च अप्पमाणो अब्याकतो धम्मो उप्पज्जति हेतुपच्चया. (संखित्तं.)

हेतुया तेरस.