१-७. पटिच्चवारादि

पच्चयचतुक्कं

हेतुपच्चयो

३१. परामासविप्पयुत्तं परामट्ठं कुसलं धम्मं पटिच्च परामासविप्पयुत्तो परामट्ठो कुसलो धम्मो उप्पज्जति हेतुपच्चया. (१)

परामासविप्पयुत्तं अपरामट्ठं कुसलं धम्मं पटिच्च परामासविप्पयुत्तो अपरामट्ठो कुसलो धम्मो उप्पज्जति हेतुपच्चया. (१) (संखित्तं.)

३२. हेतुया द्वे, आरम्मणे द्वे…पे… अविगते द्वे (संखित्तं. लोकियलोकुत्तरदुकसदिसं. सहजातवारोपि…पे… पञ्हावारोपि वित्थारेतब्बा.)

३३. परामासविप्पयुत्तं परामट्ठं अकुसलं धम्मं पटिच्च परामासविप्पयुत्तो परामट्ठो अकुसलो धम्मो उप्पज्जति हेतुपच्चया (सब्बत्थ एकं).

३४. परामासविप्पयुत्तं परामट्ठं अब्याकतं धम्मं पटिच्च परामासविप्पयुत्तो परामट्ठो अब्याकतो धम्मो उप्पज्जति हेतुपच्चया. (१)

परामासविप्पयुत्तं अपरामट्ठं अब्याकतं धम्मं पटिच्च परामासविप्पयुत्तो अपरामट्ठो अब्याकतो धम्मो उप्पज्जति हेतुपच्चया… तीणि.

परामासविप्पयुत्तं परामट्ठं अब्याकतञ्च परामासविप्पयुत्तं अपरामट्ठं अब्याकतञ्च धम्मं पटिच्च परामासविप्पयुत्तो परामट्ठो अब्याकतो धम्मो उप्पज्जति हेतुपच्चया. (१) (संखित्तं.)

३५. हेतुया पञ्च, आरम्मणे द्वे…पे… अविगते पञ्च (संखित्तं. लोकियदुकसदिसं. सहजातवारम्पि…पे… पञ्हावारम्पि वित्थारेतब्बं.)

परामासगोच्छककुसलत्तिकं निट्ठितं.