१-७. पटिच्चवारादि

पच्चयचतुक्कं

हेतुपच्चयो

३१. नीवरणविप्पयुत्तं नीवरणियं कुसलं धम्मं पटिच्च नीवरणविप्पयुत्तो नीवरणियो कुसलो धम्मो उप्पज्जति हेतुपच्चया. (१)

नीवरणविप्पयुत्तं अनीवरणियं कुसलं धम्मं पटिच्च नीवरणविप्पयुत्तो अनीवरणियो कुसलो धम्मो उप्पज्जति हेतुपच्चया. (१) (संखित्तं.)

३२. हेतुया द्वे, आरम्मणे द्वे…पे… अविगते द्वे (संखित्तं).

(सहजातवारोपि…पे… पञ्हावारोपि वित्थारेतब्बा.)

३३. नीवरणविप्पयुत्तं नीवरणियं अब्याकतं धम्मं पटिच्च नीवरणविप्पयुत्तो नीवरणियो अब्याकतो धम्मो उप्पज्जति हेतुपच्चया. (१)

नीवरणविप्पयुत्तं अनीवरणियं अब्याकतं धम्मं पटिच्च नीवरणविप्पयुत्तो अनीवरणियो अब्याकतो धम्मो उप्पज्जति हेतुपच्चया… तीणि.

नीवरणविप्पयुत्तं नीवरणियं अब्याकतञ्च नीवरणविप्पयुत्तं अनीवरणियं अब्याकतञ्च धम्मं पटिच्च नीवरणविप्पयुत्तो नीवरणियो अब्याकतो धम्मो उप्पज्जति हेतुपच्चया. (१) (संखित्तं.)

३४. हेतुया पञ्च, आरम्मणे द्वे…पे… विपाके पञ्च (संखित्तं).

(सहजातवारेपि …पे… पञ्हावारेपि सब्बत्थ वित्थारेतब्बं.)

नीवरणगोच्छककुसलत्तिकं निट्ठितं.