१-७. पटिच्चवारादि

पच्चयचतुक्कं

हेतुपच्चयो

१. नोनीवरणं कुसलं धम्मं पटिच्च नोनीवरणो कुसलो धम्मो उप्पज्जति हेतुपच्चया (संखित्तं).

२. हेतुया एकं, आरम्मणे एकं…पे… अविगते एकं (संखित्तं).

(सहजातवारेपि…पे… पञ्हावारेपि सब्बत्थ एकं).

३. नीवरणं अकुसलं धम्मं पटिच्च नीवरणो अकुसलो धम्मो उप्पज्जति हेतुपच्चया. नीवरणं अकुसलं धम्मं पटिच्च नोनीवरणो अकुसलो धम्मो उप्पज्जति हेतुपच्चया. नीवरणं अकुसलं धम्मं पटिच्च नीवरणो अकुसलो च नोनीवरणो अकुसलो च धम्मा उप्पज्जन्ति हेतुपच्चया. (३) (संखित्तं.)

४. हेतुया नव, आरम्मणे नव…पे… अविगते नव (संखित्तं).

पच्चनीयं

नहेतुपच्चयो

५. नीवरणं अकुसलं धम्मं पटिच्च नीवरणो अकुसलो धम्मो उप्पज्जति नहेतुपच्चया – विचिकिच्छानीवरणं उद्धच्चनीवरणं पटिच्च अविज्जानीवरणं. (१)

नोनीवरणं अकुसलं धम्मं पटिच्च नीवरणो अकुसलो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च अविज्जानीवरणं. (१)

नीवरणञ्च नोनीवरणञ्च अकुसलं धम्मं पटिच्च नीवरणो अकुसलो धम्मो उप्पज्जति नहेतुपच्चया – विचिकिच्छानीवरणञ्च उद्धच्चनीवरणञ्च सम्पयुत्तके च खन्धे पटिच्च अविज्जानीवरणं. (१) (संखित्तं.)

६. नहेतुया तीणि, नअधिपतिया नव, नपुरेजाते नव…पे… नकम्मे तीणि…पे… नविप्पयुत्ते नव (संखित्तं).

(सहजातवारेपि… सम्पयुत्तवारेपि सब्बत्थ नव.)

७. नीवरणो अकुसलो धम्मो नीवरणस्स अकुसलस्स धम्मस्स हेतुपच्चयेन पच्चयो (संखित्तं).

८. हेतुया तीणि, आरम्मणे नव, अधिपतिया नव…पे… आसेवने नव, कम्मे आहारे इन्द्रिये झाने मग्गे तीणि, सम्पयुत्ते नव…पे… अविगते नव (संखित्तं).

नहेतुया नव, नआरम्मणे नव (संखित्तं).

हेतुपच्चया नआरम्मणे तीणि (संखित्तं).

नहेतुपच्चया आरम्मणे नव (संखित्तं).

(यथा कुसलत्तिके पञ्हावारस्स अनुलोमम्पि पच्चनीयम्पि अनुलोमपच्चनीयम्पि पच्चनीयानुलोमम्पि गणितं, एवं गणेतब्बं).

९. नोनीवरणं अब्याकतं धम्मं पटिच्च नोनीवरणो अब्याकतो धम्मो उप्पज्जति हेतुपच्चया (संखित्तं).

१०. हेतुया एकं, आरम्मणे एकं…पे… अविगते एकं (संखित्तं).

(सहजातवारेपि…पे… पञ्हावारेपि सब्बत्थ एकं.)