१-७. पटिच्चवारादि

पच्चयचतुक्कं

हेतुपच्चयो

२४. गन्थनियञ्चेव नो च गन्थं कुसलं धम्मं पटिच्च गन्थनियो चेव नो च गन्थो कुसलो धम्मो उप्पज्जति हेतुपच्चया. (१) (संखित्तं.)

२५. हेतुया एकं, आरम्मणे एकं, अविगते एकं.

(सहजातवारेपि…पे… पञ्हावारेपि सब्बत्थ एकं.)

२६. गन्थञ्चेव गन्थनियञ्च अकुसलं धम्मं पटिच्च गन्थो चेव गन्थनियो च अकुसलो धम्मो उप्पज्जति हेतुपच्चया… तीणि.

गन्थनियञ्चेव नो च गन्थं अकुसलं धम्मं पटिच्च गन्थनियो चेव नो च गन्थो अकुसलो धम्मो उप्पज्जति हेतुपच्चया… तीणि.

गन्थञ्चेव गन्थनियं अकुसलञ्च गन्थनियञ्चेव नो च गन्थं अकुसलञ्च धम्मं पटिच्च गन्थो चेव गन्थनियो च अकुसलो धम्मो उप्पज्जति हेतुपच्चया… तीणि (संखित्तं).

२७. हेतुया नव, आरम्मणे नव, अधिपतिया नव…पे… अविगते नव (संखित्तं).

नहेतुया एकं, नअधिपतिया नव…पे… नकम्मे तीणि…पे… नविप्पयुत्ते नव (संखित्तं).

(सहजातवारम्पि…पे… सम्पयुत्तवारम्पि पटिच्चवारसदिसं वित्थारेतब्बं.)

२८. गन्थो चेव गन्थनियो च अकुसलो धम्मो गन्थस्स चेव गन्थनियस्स च अकुसलस्स धम्मस्स हेतुपच्चयेन पच्चयो (संखित्तं).

२९. हेतुया नव, आरम्मणे नव, अधिपतिया नव…पे… कम्मे आहारे इन्द्रिये झाने तीणि…पे… अविगते नव (संखित्तं).

३०. नहेतुया नव, नआरम्मणे नव (संखित्तं).

हेतुपच्चया नआरम्मणे नव (संखित्तं).

नहेतुपच्चया आरम्मणे नव (संखित्तं).

(यथा कुसलत्तिके पञ्हावारस्स अनुलोमम्पि पच्चनीयम्पि अनुलोमपच्चनीयम्पि पच्चनीयानुलोमम्पि गणितं, एवं गणेतब्बं.)

३१. गन्थनियञ्चेव नो च गन्थं अब्याकतं धम्मं पटिच्च गन्थनियो चेव नो च गन्थो अब्याकतो धम्मो उप्पज्जति हेतुपच्चया (संखित्तं).

३२. हेतुया एकं, आरम्मणे एकं…पे… अविगते एकं (संखित्तं).

(सहजातवारेपि…पे… पञ्हावारेपि सब्बत्थ एकं.)