१-७. पटिच्चवारादि

पच्चयचतुक्कं

हेतुपच्चयो

३७. सञ्ञोजनञ्चेव सञ्ञोजनसम्पयुत्तञ्च अकुसलं धम्मं पटिच्च सञ्ञोजनो चेव सञ्ञोजनसम्पयुत्तो च अकुसलो धम्मो उप्पज्जति हेतुपच्चया… तीणि.

सञ्ञोजनसम्पयुत्तञ्चेव नो च सञ्ञोजनं अकुसलं धम्मं पटिच्च सञ्ञोजनसम्पयुत्तो चेव नो च सञ्ञोजनो अकुसलो धम्मो उप्पज्जति हेतुपच्चया… तीणि.

सञ्ञोजनञ्चेव सञ्ञोजनसम्पयुत्तं अकुसलञ्च सञ्ञोजनसम्पयुत्तञ्चेव नो च सञ्ञोजनं अकुसलञ्च धम्मं पटिच्च सञ्ञोजनो चेव सञ्ञोजनसम्पयुत्तो च अकुसलो धम्मो उप्पज्जति हेतुपच्चया… तीणि (संखित्तं).

३८. हेतुया नव, आरम्मणे नव, अधिपतिया नव…पे… अविगते नव (संखित्तं).

नहेतुया तीणि, नअधिपतिया नव, नपुरेजाते नव, नपच्छाजाते नव, नआसेवने नव, नकम्मे तीणि, नविपाके नव, नविप्पयुत्ते नव (संखित्तं).

(सहजातवारोपि… सम्पयुत्तवारोपि पटिच्चवारसदिसा वित्थारेतब्बा.)

३९. सञ्ञोजनो चेव सञ्ञोजनसम्पयुत्तो च अकुसलो धम्मो सञ्ञोजनस्स चेव सञ्ञोजनसम्पयुत्तस्स च अकुसलस्स धम्मस्स हेतुपच्चयेन पच्चयो (संखित्तं).

४०. हेतुया तीणि, आरम्मणे नव, अधिपतिया नव…पे… उपनिस्सये आसेवने नव, कम्मे आहारे इन्द्रिये झाने तीणि, मग्गे सम्पयुत्ते नव…पे… अविगते नव (संखित्तं).

४१. नहेतुया नव, नआरम्मणे नव, नअधिपतिया नव (संखित्तं).

हेतुपच्चया नआरम्मणे तीणि (संखित्तं).

नहेतुपच्चया आरम्मणे नव (संखित्तं).

(यथा कुसलत्तिके पञ्हावारस्स अनुलोमम्पि पच्चनीयम्पि अनुलोमपच्चनीयम्पि पच्चनीयानुलोमम्पि गणितं, एवं गणेतब्बं.)