३. अब्याकतपदं

हेतुपच्चयो

२६. आसवविप्पयुत्तं अब्याकतं धम्मं पटिच्च आसवविप्पयुत्तो अब्याकतो धम्मो उप्पज्जति हेतुपच्चया (संखित्तं).

२७. हेतुया एकं, आरम्मणे एकं…पे… अविगते एकं (संखित्तं).

नहेतुया एकं, नआरम्मणे एकं, नअधिपतिया एकं…पे… नोविगते एकं (संखित्तं. सहजातवारेपि…पे… सम्पयुत्तवारेपि सब्बत्थ एकं).

२८. आसवविप्पयुत्तो अब्याकतो धम्मो आसवविप्पयुत्तस्स अब्याकतस्स धम्मस्स हेतुपच्चयेन पच्चयो (संखित्तं).

२९. हेतुया एकं, आरम्मणे एकं…पे… अविगते एकं (संखित्तं).

(यथा कुसलत्तिके पञ्हावारस्स अनुलोमम्पि पच्चनीयम्पि अनुलोमपच्चनीयम्पि पच्चनीयानुलोमम्पि गणितं, एवं गणेतब्बं.)

आसवसम्पयुत्तदुककुसलत्तिकं निट्ठितं.