१-७. पटिच्चवारादि

पच्चयचतुक्कं

हेतुपच्चयो

५०. लोकियं अब्याकतं धम्मं पटिच्च लोकियो अब्याकतो धम्मो उप्पज्जति हेतुपच्चया. (१)

लोकुत्तरं अब्याकतं धम्मं पटिच्च लोकुत्तरो अब्याकतो धम्मो उप्पज्जति हेतुपच्चया… तीणि.

लोकियं अब्याकतञ्च लोकुत्तरं अब्याकतञ्च धम्मं पटिच्च लोकियो अब्याकतो धम्मो उप्पज्जति हेतुपच्चया. (१) (संखित्तं.)

५१. हेतुया पञ्च, आरम्मणे द्वे…पे… आसेवने एकं, कम्मे पञ्च, विपाके पञ्च…पे… अविगते पञ्च (संखित्तं, अनुलोमं).

५२. नहेतुया एकं, नआरम्मणे तीणि, नअधिपतिया द्वे…पे… नपुरेजाते चत्तारि, नपच्छाजाते पञ्च…पे… नकम्मे एकं, नविपाके एकं, नआहारे एकं…पे… नमग्गे एकं, नसम्पयुत्ते तीणि, नविप्पयुत्ते द्वे, नोनत्थिया तीणि, नोविगते तीणि (संखित्तं, पच्चनीयं).

(सहजातवारोपि पच्चयवारोपि निस्सयवारोपि संसट्ठवारोपि सम्पयुत्तवारोपि पटिच्चवारसदिसा वित्थारेतब्बा.)

पच्चयचतुक्कं

हेतुपच्चयो

५३. लोकियो अब्याकतो धम्मो लोकियस्स अब्याकतस्स धम्मस्स हेतुपच्चयेन पच्चयो. (१)

लोकुत्तरो अब्याकतो धम्मो लोकुत्तरस्स अब्याकतस्स धम्मस्स हेतुपच्चयेन पच्चयो… तीणि (संखित्तं).

५४. हेतुया चत्तारि, आरम्मणे तीणि, अधिपतिया चत्तारि, अनन्तरे चत्तारि, सहजाते पञ्च, अञ्ञमञ्ञे द्वे, निस्सये सत्त, उपनिस्सये चत्तारि, पुरेजाते द्वे, पच्छाजाते द्वे, आसेवने एकं, कम्मे चत्तारि, विपाके चत्तारि, आहारे चत्तारि…पे… मग्गे चत्तारि, सम्पयुत्ते द्वे, विप्पयुत्ते तीणि, अत्थिया सत्त…पे… अविगते सत्त (संखित्तं).

(यथा कुसलत्तिके पञ्हावारस्स अनुलोमम्पि पच्चनीयम्पि अनुलोमपच्चनीयम्पि पच्चनीयानुलोमम्पि गणितं, एवं गणेतब्बं.)

लोकियदुककुसलत्तिकं निट्ठितं.