१-७. पटिच्चवारादि

पच्चयचतुक्कं

हेतुपच्चयो

४३. लोकियं कुसलं धम्मं पटिच्च लोकियो कुसलो धम्मो उप्पज्जति हेतुपच्चया. (१)

लोकुत्तरं कुसलं धम्मं पटिच्च लोकुत्तरो कुसलो धम्मो उप्पज्जति हेतुपच्चया. (१)

लोकियं कुसलं धम्मं पटिच्च लोकियो कुसलो धम्मो उप्पज्जति आरम्मणपच्चया. (१)

लोकुत्तरं कुसलं धम्मं पटिच्च लोकुत्तरो कुसलो धम्मो उप्पज्जति आरम्मणपच्चया. (१) (संखित्तं.)

४४. हेतुया द्वे, आरम्मणे द्वे, अधिपतिया द्वे…पे… कम्मे द्वे…पे… अविगते द्वे (संखित्तं, अनुलोमं).

४५. नअधिपतिया द्वे…पे… नआसेवने एकं…पे… नविप्पयुत्ते द्वे (संखित्तं).

(सहजातवारोपि पच्चयवारोपि निस्सयवारोपि संसट्ठवारोपि सम्पयुत्तवारोपि पटिच्चवारसदिसा वित्थारेतब्बा.)

पच्चयचतुक्कं

हेतुपच्चयादि

४६. लोकियो कुसलो धम्मो लोकियस्स कुसलस्स धम्मस्स हेतुपच्चयेन पच्चयो. (१)

लोकुत्तरो कुसलो धम्मो लोकुत्तरस्स कुसलस्स धम्मस्स हेतुपच्चयेन पच्चयो. (१)

लोकियो कुसलो धम्मो लोकियस्स कुसलस्स धम्मस्स आरम्मणपच्चयेन पच्चयो. (१)

लोकुत्तरो कुसलो धम्मो लोकियस्स कुसलस्स धम्मस्स आरम्मणपच्चयेन पच्चयो. (१)

लोकियो कुसलो धम्मो लोकियस्स कुसलस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. (१)

लोकुत्तरो कुसलो धम्मो लोकुत्तरस्स कुसलस्स धम्मस्स अधिपतिपच्चयेन पच्चयो – सहजाताधिपति. लोकुत्तरो कुसलो धम्मो लोकियस्स कुसलस्स धम्मस्स अधिपतिपच्चयेन पच्चयो – आरम्मणाधिपति. (२) (संखित्तं.)

४७. हेतुया द्वे, आरम्मणे द्वे, अधिपतिया तीणि, अनन्तरे द्वे, समनन्तरे द्वे, सहजाते द्वे…पे… उपनिस्सये चत्तारि, आसेवने द्वे, कम्मे द्वे, आहारे द्वे…पे… अविगते द्वे (संखित्तं.)