१-६. पटिच्चवारादि

पच्चयचतुक्कं

हेतुपच्चयो

४७. हेतुञ्चेव सहेतुकञ्च कुसलं धम्मं पटिच्च हेतु चेव सहेतुको च कुसलो धम्मो उप्पज्जति हेतुपच्चया… तीणि.

सहेतुकञ्चेव न च हेतुं कुसलं धम्मं पटिच्च सहेतुको चेव न च हेतु कुसलो धम्मो उप्पज्जति हेतुपच्चया… तीणि.

हेतुञ्चेव सहेतुकञ्च कुसलञ्च सहेतुकञ्चेव न च हेतुं कुसलञ्च धम्मं पटिच्च हेतु चेव सहेतुको च कुसलो धम्मो उप्पज्जति हेतुपच्चया… तीणि (संखित्तं).

४८. हेतुया नव, आरम्मणे नव…पे… कम्मे नव, आहारे नव…पे… अविगते नव (संखित्तं).

नअधिपतिपच्चयो

४९. हेतुञ्चेव सहेतुकञ्च कुसलं धम्मं पटिच्च हेतु चेव सहेतुको च कुसलो धम्मो उप्पज्जति नअधिपतिपच्चया (संखित्तं).

५०. नअधिपतिया नव, नपुरेजाते नव, नपच्छाजाते नव, नआसेवने नव, नकम्मे तीणि, नविपाके नव, नविप्पयुत्ते नव (संखित्तं).

हेतुपच्चया नअधिपतिया नव (संखित्तं).

नअधिपतिपच्चया हेतुया नव (संखित्तं).

(सहजातवारोपि पच्चयवारोपि निस्सयवारोपि संसट्ठवारोपि सम्पयुत्तवारोपि पटिच्चवारसदिसा वित्थारेतब्बा.)