१-६. पटिच्चवारादि

पच्चयचतुक्कं

हेतुपच्चयो

३९. हेतुसम्पयुत्तं अब्याकतं धम्मं पटिच्च हेतुसम्पयुत्तो अब्याकतो धम्मो उप्पज्जति हेतुपच्चया… तीणि.

हेतुविप्पयुत्तं अब्याकतं धम्मं पटिच्च हेतुविप्पयुत्तो अब्याकतो धम्मो उप्पज्जति हेतुपच्चया… तीणि.

हेतुसम्पयुत्तं अब्याकतञ्च हेतुविप्पयुत्तं अब्याकतञ्च धम्मं पटिच्च हेतुसम्पयुत्तो अब्याकतो धम्मो उप्पज्जति हेतुपच्चया… तीणि (संखित्तं).

४०. हेतुया नव, आरम्मणे चत्तारि, अधिपतिया पञ्च, अनन्तरे चत्तारि, समनन्तरे चत्तारि, सहजाते नव, अञ्ञमञ्ञे छ…पे… पुरेजाते द्वे, आसेवने द्वे, कम्मे नव, विपाके नव…पे… अविगते नव (संखित्तं).

नहेतु-नआरम्मणपच्चया

४१. हेतुविप्पयुत्तं अब्याकतं धम्मं पटिच्च हेतुविप्पयुत्तो अब्याकतो धम्मो उप्पज्जति नहेतुपच्चया. (१)

हेतुसम्पयुत्तं अब्याकतं धम्मं पटिच्च हेतुविप्पयुत्तो अब्याकतो धम्मो उप्पज्जति नआरम्मणपच्चया (संखित्तं).

४२. नहेतुया एकं, नआरम्मणे तीणि, नअधिपतिया नव, नअनन्तरे तीणि, नसमनन्तरे तीणि, नअञ्ञमञ्ञे तीणि, नउपनिस्सये तीणि, नपुरेजाते नव, नपच्छाजाते नव, नआसेवने नव, नकम्मे द्वे, नविपाके पञ्च, नआहारे एकं, नइन्द्रिये एकं, नझाने एकं, नमग्गे एकं, नसम्पयुत्ते तीणि, नविप्पयुत्ते द्वे, नोनत्थिया तीणि, नोविगते तीणि (संखित्तं).

हेतुपच्चया नआरम्मणे तीणि (संखित्तं).

नहेतुपच्चया आरम्मणे एकं (संखित्तं).

(सहजातवारोपि पच्चयवारोपि निस्सयवारोपि संसट्ठवारोपि सम्पयुत्तवारोपि पटिच्चवारसदिसा वित्थारेतब्बा.)