अवितक्कपदं

हेतुपच्चयो

१६. कुसलं अवितक्कं धम्मं पटिच्च कुसलो अवितक्को धम्मो उप्पज्जति हेतुपच्चया (संखित्तं).

हेतुया सत्त, आरम्मणे द्वे…पे… विपाके एकं, अविगते सत्त (संखित्तं. सहजातवारम्पि…पे… सम्पयुत्तवारम्पि पटिच्चवारसदिसं).

१७. कुसलो अवितक्को धम्मो कुसलस्स अवितक्कस्स धम्मस्स हेतुपच्चयेन पच्चयो… तीणि.

अब्याकतो अवितक्को धम्मो अब्याकतस्स अवितक्कस्स धम्मस्स हेतुपच्चयेन पच्चयो. (१) (संखित्तं.)

१८. हेतुया चत्तारि, आरम्मणे नव…पे… अविगते दस (संखित्तं. यथा कुसलत्तिके पञ्हावारं, एवं वित्थारेतब्बं).