१. विभङ्गवारो

नहेतुपच्चयो

५. किलेसं धम्मं पटिच्च किलेसो धम्मो उप्पज्जति नहेतुपच्चया – विचिकिच्छं पटिच्च मोहो, उद्धच्चं पटिच्च मोहो. (१)

नोकिलेसं धम्मं पटिच्च नोकिलेसो धम्मो उप्पज्जति नहेतुपच्चया – अहेतुकं नोकिलेसं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… (याव असञ्ञसत्ता). (१)

नोकिलेसं धम्मं पटिच्च किलेसो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (२)

किलेसञ्च नोकिलेसञ्च धम्मं पटिच्च किलेसो धम्मो उप्पज्जति नहेतुपच्चया – विचिकिच्छासहगते खन्धे च विचिकिच्छञ्च पटिच्च विचिकिच्छासहगतो मोहो, उद्धच्चसहगते खन्धे च उद्धच्चञ्च पटिच्च उद्धच्चसहगतो मोहो. (१)

नआरम्मणपच्चयादि

६. किलेसं धम्मं पटिच्च नोकिलेसो धम्मो उप्पज्जति नआरम्मणपच्चया – किलेसे पटिच्च चित्तसमुट्ठानं रूपं. (१)

नोकिलेसं धम्मं पटिच्च नोकिलेसो धम्मो उप्पज्जति नआरम्मणपच्चया – नोकिलेसे खन्धे पटिच्च चित्तसमुट्ठानं रूपं; पटिसन्धिक्खणे…पे… खन्धे पटिच्च वत्थु (याव असञ्ञसत्ता). (१)

किलेसञ्च नोकिलेसञ्च धम्मं पटिच्च नोकिलेसो धम्मो उप्पज्जति नआरम्मणपच्चया – किलेसे च सम्पयुत्तके च खन्धे पटिच्च चित्तसमुट्ठानं रूपं, किलेसे च महाभूते च पटिच्च चित्तसमुट्ठानं रूपं. (१)

नअधिपतिपच्चया… नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया.

नपुरेजातपच्चयादि

७. किलेसं धम्मं पटिच्च किलेसो धम्मो उप्पज्जति नपुरेजातपच्चया – अरूपे लोभं पटिच्च मोहो दिट्ठि थिनं उद्धच्चं अहिरिकं अनोत्तप्पं, लोभं पटिच्च मोहो दिट्ठि उद्धच्चं अहिरिकं अनोत्तप्पं, लोभं पटिच्च मोहो मानो थिनं उद्धच्चं अहिरिकं अनोत्तप्पं, लोभं पटिच्च मोहो मानो उद्धच्चं अहिरिकं अनोत्तप्पं, लोभं पटिच्च मोहो थिनं उद्धच्चं अहिरिकं अनोत्तप्पं, लोभं पटिच्च मोहो उद्धच्चं अहिरिकं अनोत्तप्पं; विचिकिच्छं पटिच्च मोहो उद्धच्चं अहिरिकं अनोत्तप्पं; उद्धच्चं पटिच्च मोहो अहिरिकं अनोत्तप्पं (अरूपे दोसमूलकं नत्थि). (१)

किलेसं धम्मं पटिच्च नोकिलेसो धम्मो उप्पज्जति नपुरेजातपच्चया – अरूपे किलेसे पटिच्च सम्पयुत्तका खन्धा, किलेसे पटिच्च चित्तसमुट्ठानं रूपं (एवं नवपि पञ्हा कातब्बा), नपच्छाजातपच्चया, नआसेवनपच्चया.

नकम्मपच्चयो

८. किलेसं धम्मं पटिच्च नोकिलेसो धम्मो उप्पज्जति नकम्मपच्चया – किलेसे पटिच्च सम्पयुत्तका चेतना. (१)

नोकिलेसं धम्मं पटिच्च नोकिलेसो धम्मो उप्पज्जति नकम्मपच्चया – नोकिलेसे खन्धे पटिच्च सम्पयुत्तका चेतना; बाहिरं… आहारसमुट्ठानं… उतुसमुट्ठानं…पे…. (१)

किलेसञ्च नोकिलेसञ्च धम्मं पटिच्च नोकिलेसो धम्मो उप्पज्जति नकम्मपच्चया – किलेसे च सम्पयुत्तके च खन्धे पटिच्च सम्पयुत्तका चेतना. (१) (एवं सब्बे पच्चया कातब्बा.)