१. विभङ्गवारो

हेतुपच्चयो

८०. किलेसञ्चेव संकिलिट्ठञ्च धम्मं पटिच्च किलेसो चेव संकिलिट्ठो च धम्मो उप्पज्जति हेतुपच्चया – लोभं पटिच्च मोहो दिट्ठि थिनं उद्धच्चं अहिरिकं अनोत्तप्पं (चक्कं). (१)

किलेसञ्चेव संकिलिट्ठञ्च धम्मं पटिच्च संकिलिट्ठो चेव नो च किलेसो धम्मो उप्पज्जति हेतुपच्चया – किलेसे पटिच्च सम्पयुत्तका खन्धा. (२)

किलेसञ्चेव संकिलिट्ठञ्च धम्मं पटिच्च किलेसो चेव संकिलिट्ठो च संकिलिट्ठो चेव नो च किलेसो च धम्मा उप्पज्जन्ति हेतुपच्चया – लोभं पटिच्च मोहो दिट्ठि थिनं उद्धच्चं अहिरिकं अनोत्तप्पं सम्पयुत्तका च खन्धा (चक्कं). (३)

८१. संकिलिट्ठञ्चेव नो च किलेसं धम्मं पटिच्च संकिलिट्ठो चेव नो च किलेसो धम्मो उप्पज्जति हेतुपच्चया – संकिलिट्ठञ्चेव नो च किलेसं एकं खन्धं पटिच्च तयो खन्धा…पे… द्वे खन्धे…पे…. (१)

संकिलिट्ठञ्चेव नो च किलेसं धम्मं पटिच्च किलेसो चेव संकिलिट्ठो च धम्मो उप्पज्जति हेतुपच्चया – संकिलिट्ठे चेव नो च किलेसे खन्धे पटिच्च किलेसा. (२)

संकिलिट्ठञ्चेव नो च किलेसं धम्मं पटिच्च किलेसो चेव संकिलिट्ठो च संकिलिट्ठो चेव नो च किलेसो च धम्मा उप्पज्जन्ति हेतुपच्चया – संकिलिट्ठञ्चेव नो च किलेसं एकं खन्धं पटिच्च तयो खन्धा किलेसा च…पे… द्वे खन्धे…पे…. (३)

८२. किलेसञ्चेव संकिलिट्ठञ्च संकिलिट्ठञ्चेव नो च किलेसञ्च धम्मं पटिच्च किलेसो चेव संकिलिट्ठो च धम्मो उप्पज्जति हेतुपच्चया – लोभञ्च सम्पयुत्तके च खन्धे पटिच्च मोहो दिट्ठि थिनं उद्धच्चं अहिरिकं अनोत्तप्पं (चक्कं). (१)

किलेसञ्चेव संकिलिट्ठञ्च संकिलिट्ठञ्चेव नो च किलेसञ्च धम्मं पटिच्च संकिलिट्ठो चेव नो च किलेसो धम्मो उप्पज्जति हेतुपच्चया – संकिलिट्ठञ्चेव नो च किलेसं एकं खन्धञ्च किलेसे च पटिच्च तयो खन्धा…पे… द्वे खन्धे च…पे…. (२)

किलेसञ्चेव संकिलिट्ठञ्च संकिलिट्ठञ्चेव नो च किलेसञ्च धम्मं पटिच्च किलेसो चेव संकिलिट्ठो च संकिलिट्ठो चेव नो च किलेसो च धम्मा उप्पज्जन्ति हेतुपच्चया – संकिलिट्ठञ्चेव नो च किलेसं एकं खन्धञ्च लोभञ्च पटिच्च तयो खन्धा मोहो दिट्ठि थिनं उद्धच्चं अहिरिकं अनोत्तप्पं…पे… द्वे खन्धे च…पे… (चक्कं). (३)