१. विभङ्गवारो

हेतुपच्चयो

७५. किलेसो चेव संकिलेसिको च धम्मो किलेसस्स चेव संकिलेसिकस्स च धम्मस्स हेतुपच्चयेन पच्चयो – किलेसा चेव संकिलेसिका च हेतू सम्पयुत्तकानं किलेसानं हेतुपच्चयेन पच्चयो (एवं चत्तारि, किलेसदुकसदिसं.) (४)

आरम्मणपच्चयो

७६. किलेसो चेव संकिलेसिको च धम्मो किलेसस्स चेव संकिलेसिकस्स च धम्मस्स आरम्मणपच्चयेन पच्चयो – किलेसे आरब्भ किलेसा उप्पज्जन्ति. (मूलं कातब्बं.) किलेसे आरब्भ संकिलेसिका चेव नो च किलेसा खन्धा उप्पज्जन्ति. (मूलं कातब्बं.) किलेसे आरब्भ किलेसा च सम्पयुत्तका च खन्धा उप्पज्जन्ति. (३)

७७. संकिलेसिको चेव नो च किलेसो धम्मो संकिलेसिकस्स चेव नो च किलेसस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं…पे… पुब्बे सुचिण्णानि…पे… झाना वुट्ठहित्वा झानं पच्चवेक्खति, अस्सादेति अभिनन्दति, तं आरब्भ रागो उप्पज्जति…पे… उद्धच्चं उप्पज्जति, झाने परिहीने विप्पटिसारिस्स दोमनस्सं उप्पज्जति; अरिया गोत्रभुं पच्चवेक्खन्ति, वोदानं पच्चवेक्खन्ति, चक्खुं…पे… वत्थुं संकिलेसिके चेव नो च किलेसे खन्धे अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति…पे… आवज्जनाय आरम्मणपच्चयेन पच्चयो (इतरे द्वे किलेसदुकसदिसा, घटनारम्मणापि किलेसदुकसदिसा).

अधिपतिपच्चयो

७८. किलेसो चेव संकिलेसिको च धम्मो किलेसस्स चेव संकिलेसिकस्स च धम्मस्स अधिपतिपच्चयेन पच्चयो – आरम्मणाधिपति… तीणि.

संकिलेसिको चेव नो च किलेसो धम्मो संकिलेसिकस्स चेव नो च किलेसस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं…पे… पुब्बे सुचिण्णानि…पे… झाना वुट्ठहित्वा झानं गरुं कत्वा पच्चवेक्खति, सेक्खा गोत्रभुं गरुं कत्वा पच्चवेक्खन्ति, वोदानं गरुं कत्वा पच्चवेक्खन्ति; चक्खुं…पे… वत्थुं संकिलेसिके चेव नो च किलेसे खन्धे गरुं कत्वा संकिलेसिका चेव नो च किलेसा खन्धा उप्पज्जन्ति. सहजाताधिपति – संकिलेसिका चेव नो च किलेसाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (इतरे द्वेपि किलेसदुकसदिसा. घटनाधिपतिपि.)

अनन्तरपच्चयादि

७९. किलेसो चेव संकिलेसिको च धम्मो किलेसस्स चेव संकिलेसिकस्स च धम्मस्स अनन्तरपच्चयेन पच्चयो… तीणि (किलेसदुकसदिसा).

संकिलेसिको चेव नो च किलेसो धम्मो संकिलेसिकस्स चेव नो च किलेसस्स धम्मस्स अनन्तरपच्चयेन पच्चयो – पुरिमा पुरिमा संकिलेसिका चेव नो च किलेसा खन्धा पच्छिमानं पच्छिमानं संकिलेसिकानञ्चेव नो च किलेसानं खन्धानं अनन्तरपच्चयेन पच्चयो; अनुलोमं गोत्रभुस्स… अनुलोमं वोदानस्स… आवज्जना संकिलेसिकानञ्चेव नो च किलेसानं खन्धानं अनन्तरपच्चयेन पच्चयो.

(इतरे द्वे अनन्तरा किलेसदुकसदिसा, निन्नानाकरणा. घटनानन्तरम्पि सब्बे पच्चया किलेसदुकसदिसा, निन्नानाकरणा. उपनिस्सये लोकुत्तरं नत्थि, इदं दुकं किलेसदुकसदिसं, निन्नानाकरणं.)

किलेससंकिलेसिकदुकं निट्ठितं.