१. विभङ्गवारो

हेतुपच्चयो

५१. संकिलिट्ठो धम्मो संकिलिट्ठस्स धम्मस्स हेतुपच्चयेन पच्चयो – संकिलिट्ठा हेतू सम्पयुत्तकानं खन्धानं हेतुपच्चयेन पच्चयो. (१)

संकिलिट्ठो धम्मो असंकिलिट्ठस्स धम्मस्स हेतुपच्चयेन पच्चयो – संकिलिट्ठा हेतू चित्तसमुट्ठानानं रूपानं हेतुपच्चयेन पच्चयो. (२)

संकिलिट्ठो धम्मो संकिलिट्ठस्स च असंकिलिट्ठस्स च धम्मस्स हेतुपच्चयेन पच्चयो – संकिलिट्ठा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (३)

असंकिलिट्ठो धम्मो असंकिलिट्ठस्स धम्मस्स हेतुपच्चयेन पच्चयो – असंकिलिट्ठा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

आरम्मणपच्चयो

५२. संकिलिट्ठो धम्मो संकिलिट्ठस्स धम्मस्स आरम्मणपच्चयेन पच्चयो – रागं अस्सादेति अभिनन्दति, तं आरब्भ रागो उप्पज्जति, दिट्ठि उप्पज्जति; विचिकिच्छा…पे… उद्धच्च…पे… दोमनस्सं उप्पज्जति; दिट्ठिं अस्सादेति…पे… (कुसलत्तिकसदिसं); विचिकिच्छं आरब्भ…पे… उद्धच्चं आरब्भ…पे… दोमनस्सं उप्पज्जति; दिट्ठि…पे… विचिकिच्छा…पे… उद्धच्चं उप्पज्जति. (१)

संकिलिट्ठो धम्मो असंकिलिट्ठस्स धम्मस्स आरम्मणपच्चयेन पच्चयो – अरिया पहीने किलेसे पच्चवेक्खन्ति, विक्खम्भिते किलेसे…पे… पुब्बे समुदाचिण्णे…पे… संकिलिट्ठे खन्धे अनिच्चतो…पे… विपस्सति, चेतोपरियञाणेन संकिलिट्ठचित्तसमङ्गिस्स चित्तं जानाति; संकिलिट्ठा खन्धा चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

५३. असंकिलिट्ठो धम्मो असंकिलिट्ठस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं…पे… पुब्बे…पे… झाना वुट्ठहित्वा झानं पच्चवेक्खति, अरिया मग्गा वुट्ठहित्वा मग्गं पच्चवेक्खन्ति…पे… आवज्जनाय आरम्मणपच्चयेन पच्चयो; चक्खुं…पे… वत्थुं असंकिलिट्ठे खन्धे अनिच्चतो…पे… विपस्सति, दिब्बेन चक्खुना रूपं पस्सति…पे… अनागतंसञाणस्स, आवज्जनाय आरम्मणपच्चयेन पच्चयो. (१)

असंकिलिट्ठो धम्मो संकिलिट्ठस्स धम्मस्स आरम्मणपच्चयेन पच्चयो – दानं…पे… सीलं…पे… झाना वुट्ठहित्वा…पे… चक्खुं…पे… वत्थुं असंकिलिट्ठे खन्धे अस्सादेति अभिनन्दति, तं आरब्भ रागो…पे… दोमनस्सं उप्पज्जति. (२)

अधिपतिपच्चयो

५४. संकिलिट्ठो धम्मो संकिलिट्ठस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – रागं गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति; दिट्ठिं गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – संकिलिट्ठाधिपति सम्पयुत्तकानं खन्धानं अधिपतिपच्चयेन पच्चयो. (१)

संकिलिट्ठो धम्मो असंकिलिट्ठस्स धम्मस्स अधिपतिपच्चयेन पच्चयो. सहजाताधिपति – संकिलिट्ठाधिपति चित्तसमुट्ठानानं रूपानं अधिपतिपच्चयेन पच्चयो. (२)

संकिलिट्ठो धम्मो संकिलिट्ठस्स च असंकिलिट्ठस्स च धम्मस्स अधिपतिपच्चयेन पच्चयो. सहजाताधिपति – संकिलिट्ठाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

५५. असंकिलिट्ठो धम्मो असंकिलिट्ठस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं…पे… पुब्बे…पे… झाना वुट्ठहित्वा झानं गरुं कत्वा पच्चवेक्खति, अरिया मग्गा वुट्ठहित्वा मग्गं गरुं कत्वा पच्चवेक्खन्ति…पे… निब्बानं फलस्स अधिपतिपच्चयेन पच्चयो. सहजाताधिपति – असंकिलिट्ठाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

असंकिलिट्ठो धम्मो संकिलिट्ठस्स धम्मस्स अधिपतिपच्चयेन पच्चयो. आरम्मणाधिपति – दानं…पे… सीलं…पे… उपोसथकम्मं…पे… पुब्बे…पे… झाना वुट्ठहित्वा…पे… चक्खुं…पे… वत्थुं असंकिलिट्ठे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (२)

अनन्तरपच्चयादि

५६. संकिलिट्ठो धम्मो संकिलिट्ठस्स धम्मस्स अनन्तरपच्चयेन पच्चयो – पुरिमा पुरिमा संकिलिट्ठा खन्धा पच्छिमानं पच्छिमानं संकिलिट्ठानं खन्धानं अनन्तरपच्चयेन पच्चयो. (१)

संकिलिट्ठो धम्मो असंकिलिट्ठस्स धम्मस्स अनन्तरपच्चयेन पच्चयो – संकिलिट्ठा खन्धा वुट्ठानस्स अनन्तरपच्चयेन पच्चयो. (२)

५७. असंकिलिट्ठो धम्मो असंकिलिट्ठस्स धम्मस्स अनन्तरपच्चयेन पच्चयो – पुरिमा पुरिमा असंकिलिट्ठा खन्धा पच्छिमानं पच्छिमानं असंकिलिट्ठानं खन्धानं…पे… फलसमापत्तिया अनन्तरपच्चयेन पच्चयो. (१)

असंकिलिट्ठो धम्मो संकिलिट्ठस्स धम्मस्स अनन्तरपच्चयेन पच्चयो – आवज्जना संकिलिट्ठानं खन्धानं अनन्तरपच्चयेन पच्चयो. (२)

समनन्तरपच्चयेन पच्चयो… चत्तारि… सहजातपच्चयेन पच्चयो… पञ्च… अञ्ञमञ्ञपच्चयेन पच्चयो… द्वे… निस्सयपच्चयेन पच्चयो… सत्त.

उपनिस्सयपच्चयो

५८. संकिलिट्ठो धम्मो संकिलिट्ठस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – रागं उपनिस्साय पाणं हनति…पे… सङ्घं भिन्दति, दोसं…पे… पत्थनं उपनिस्साय पाणं हनति…पे… सङ्घं भिन्दति, रागो…पे… पत्थना रागस्स…पे… पत्थनाय उपनिस्सयपच्चयेन पच्चयो. (१)

संकिलिट्ठो धम्मो असंकिलिट्ठस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – रागं उपनिस्साय दानं देति…पे… समापत्तिं उप्पादेति, दोसं…पे… पत्थनं उपनिस्साय दानं देति…पे… समापत्तिं उप्पादेति, रागो…पे… पत्थना सद्धाय…पे… पञ्ञाय कायिकस्स सुखस्स… कायिकस्स दुक्खस्स… मग्गस्स, फलसमापत्तिया उपनिस्सयपच्चयेन पच्चयो. (२)

५९. असंकिलिट्ठो धम्मो असंकिलिट्ठस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… समापत्तिं उप्पादेति; सीलं…पे… पञ्ञं, कायिकं सुखं… कायिकं दुक्खं… उतुं… भोजनं… सेनासनं उपनिस्साय दानं देति…पे… समापत्तिं उप्पादेति; सद्धा…पे… सेनासनं सद्धाय…पे… फलसमापत्तिया उपनिस्सयपच्चयेन पच्चयो. (१)

असंकिलिट्ठो धम्मो संकिलिट्ठस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय मानं जप्पेति, दिट्ठिं गण्हाति; सीलं…पे… पञ्ञं… कायिकं सुखं… कायिकं दुक्खं… उतुं… भोजनं… सेनासनं उपनिस्साय पाणं हनति…पे… सङ्घं भिन्दति; सद्धा…पे… सेनासनं रागस्स…पे… पत्थनाय उपनिस्सयपच्चयेन पच्चयो. (२)

पुरेजातपच्चयो

६०. असंकिलिट्ठो धम्मो असंकिलिट्ठस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं (संखित्तं). असंकिलिट्ठो धम्मो संकिलिट्ठस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं (संखित्तं). (२)

पच्छाजातासेवनपच्चया

६१. संकिलिट्ठो धम्मो असंकिलिट्ठस्स धम्मस्स पच्छाजातपच्चयेन पच्चयो (संखित्तं). असंकिलिट्ठो धम्मो असंकिलिट्ठस्स धम्मस्स पच्छाजातपच्चयेन पच्चयो (संखित्तं). …आसेवनपच्चयेन पच्चयो… द्वे.

कम्मपच्चयो

६२. संकिलिट्ठो धम्मो संकिलिट्ठस्स धम्मस्स कम्मपच्चयेन पच्चयो – संकिलिट्ठा चेतना सम्पयुत्तकानं खन्धानं कम्मपच्चयेन पच्चयो. (१)

संकिलिट्ठो धम्मो असंकिलिट्ठस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – संकिलिट्ठा चेतना चित्तसमुट्ठानानं रूपानं कम्मपच्चयेन पच्चयो. नानाक्खणिका – संकिलिट्ठा चेतना विपाकानं खन्धानं कटत्ता च रूपानं कम्मपच्चयेन पच्चयो. (मूलं कातब्बं.) संकिलिट्ठा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

असंकिलिट्ठो धम्मो असंकिलिट्ठस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – असंकिलिट्ठा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – असंकिलिट्ठा चेतना विपाकानं खन्धानं कटत्ता च रूपानं कम्मपच्चयेन पच्चयो. (१)

विपाकपच्चयादि

६३. असंकिलिट्ठो धम्मो असंकिलिट्ठस्स धम्मस्स विपाकपच्चयेन पच्चयो… एकं.

संकिलिट्ठो धम्मो संकिलिट्ठस्स धम्मस्स आहारपच्चयेन पच्चयो… इन्द्रियपच्चयेन पच्चयो… झानपच्चयेन पच्चयो… मग्गपच्चयेन पच्चयो… सम्पयुत्तपच्चयेन पच्चयो.

विप्पयुत्तपच्चयो

६४. संकिलिट्ठो धम्मो असंकिलिट्ठस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

असंकिलिट्ठो धम्मो असंकिलिट्ठस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं). (१)

असंकिलिट्ठो धम्मो संकिलिट्ठस्स धम्मस्स विप्पयुत्तपच्चयेन पच्चयो. पुरेजातं – वत्थु संकिलिट्ठानं खन्धानं विप्पयुत्तपच्चयेन पच्चयो. (२)

अत्थिपच्चयादि

६५. संकिलिट्ठो धम्मो संकिलिट्ठस्स धम्मस्स अत्थिपच्चयेन पच्चयो … एकं (पटिच्चवारसदिसं). संकिलिट्ठो धम्मो असंकिलिट्ठस्स धम्मस्स अत्थिपच्चयेन पच्चयो – सहजातं, पच्छाजातं (संखित्तं). संकिलिट्ठो धम्मो संकिलिट्ठस्स च असंकिलिट्ठस्स च धम्मस्स अत्थिपच्चयेन पच्चयो (पटिच्चसदिसं). (३)

असंकिलिट्ठो धम्मो असंकिलिट्ठस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). असंकिलिट्ठो धम्मो संकिलिट्ठस्स धम्मस्स अत्थिपच्चयेन पच्चयो – पुरेजातं (संखित्तं). (२)

६६. संकिलिट्ठो च असंकिलिट्ठो च धम्मा संकिलिट्ठस्स धम्मस्स अत्थिपच्चयेन पच्चयो – सहजातं, पुरेजातं. सहजातो – संकिलिट्ठो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे… (संखित्तं). (१)

संकिलिट्ठो च असंकिलिट्ठो च धम्मा असंकिलिट्ठस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – संकिलिट्ठा खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. पच्छाजाता – संकिलिट्ठा खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – संकिलिट्ठा खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो.