१. विभङ्गवारो

नहेतुपच्चयो

४७. संकिलिट्ठं धम्मं पच्चया संकिलिट्ठो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पच्चया विचिकिच्छासहगतो उद्धच्चसहगतो मोहो. (१)

असंकिलिट्ठं धम्मं पच्चया असंकिलिट्ठो धम्मो उप्पज्जति नहेतुपच्चया – अहेतुकं असंकिलिट्ठं…पे… (याव असञ्ञसत्ता) चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका असंकिलिट्ठा खन्धा. (१)

असंकिलिट्ठं धम्मं पच्चया संकिलिट्ठो धम्मो उप्पज्जति नहेतुपच्चया – वत्थुं पच्चया विचिकिच्छासहगतो उद्धच्चसहगतो मोहो. (२)

संकिलिट्ठञ्च असंकिलिट्ठञ्च धम्मं पच्चया संकिलिट्ठो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)