१. विभङ्गवारो

हेतुपच्चयो

४४. संकिलिट्ठं धम्मं पच्चया संकिलिट्ठो धम्मो उप्पज्जति हेतुपच्चया… तीणि (पटिच्चसदिसं).

असंकिलिट्ठं धम्मं पच्चया असंकिलिट्ठो धम्मो उप्पज्जति हेतुपच्चया – असंकिलिट्ठं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… (याव अज्झत्तिका महाभूता) वत्थुं पच्चया असंकिलिट्ठा खन्धा. (१)

असंकिलिट्ठं धम्मं पच्चया संकिलिट्ठो धम्मो उप्पज्जति हेतुपच्चया – वत्थुं पच्चया संकिलिट्ठा खन्धा. (२)

असंकिलिट्ठं धम्मं पच्चया संकिलिट्ठो च असंकिलिट्ठो च धम्मा उप्पज्जन्ति हेतुपच्चया – वत्थुं पच्चया संकिलिट्ठा खन्धा, महाभूते पच्चया चित्तसमुट्ठानं रूपं. (३)

४५. संकिलिट्ठञ्च असंकिलिट्ठञ्च धम्मं पच्चया संकिलिट्ठो धम्मो उप्पज्जति हेतुपच्चया – संकिलिट्ठं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे…. (१)

संकिलिट्ठञ्च असंकिलिट्ठञ्च धम्मं पच्चया असंकिलिट्ठो धम्मो उप्पज्जति हेतुपच्चया – संकिलिट्ठे खन्धे च महाभूते च पच्चया चित्तसमुट्ठानं रूपं. (२)

संकिलिट्ठञ्च असंकिलिट्ठञ्च धम्मं पच्चया संकिलिट्ठो च असंकिलिट्ठो च धम्मा उप्पज्जन्ति हेतुपच्चया – संकिलिट्ठं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… संकिलिट्ठे खन्धे च महाभूते च पच्चया चित्तसमुट्ठानं रूपं (संखित्तं). (३)