१. विभङ्गवारो

हेतुपच्चयो

१. किलेसं धम्मं पटिच्च किलेसो धम्मो उप्पज्जति हेतुपच्चया – लोभं पटिच्च मोहो दिट्ठि थिनं [थीनं (सी. स्या.)] उद्धच्चं अहिरिकं अनोत्तप्पं, लोभं पटिच्च मोहो दिट्ठि उद्धच्चं अहिरिकं अनोत्तप्पं, लोभं पटिच्च मोहो मानो थिनं उद्धच्चं अहिरिकं अनोत्तप्पं, लोभं पटिच्च मोहो मानो उद्धच्चं अहिरिकं अनोत्तप्पं, लोभं पटिच्च मोहो थिनं उद्धच्चं अहिरिकं अनोत्तप्पं, लोभं पटिच्च मोहो उद्धच्चं अहिरिकं अनोत्तप्पं; दोसं पटिच्च मोहो थिनं उद्धच्चं अहिरिकं अनोत्तप्पं, दोसं पटिच्च मोहो उद्धच्चं अहिरिकं अनोत्तप्पं; विचिकिच्छं पटिच्च मोहो उद्धच्चं अहिरिकं अनोत्तप्पं; उद्धच्चं पटिच्च मोहो अहिरिकं अनोत्तप्पं. (१)

किलेसं धम्मं पटिच्च नोकिलेसो धम्मो उप्पज्जति हेतुपच्चया – किलेसं पटिच्च सम्पयुत्तका खन्धा चित्तसमुट्ठानञ्च रूपं. (२)

किलेसं धम्मं पटिच्च किलेसो च नोकिलेसो च धम्मा उप्पज्जन्ति हेतुपच्चया – लोभं पटिच्च मोहो दिट्ठि थिनं उद्धच्चं अहिरिकं अनोत्तप्पं सम्पयुत्तका च खन्धा चित्तसमुट्ठानञ्च रूपं (चक्कं). (३)

२. नोकिलेसं धम्मं पटिच्च नोकिलेसो धम्मो उप्पज्जति हेतुपच्चया – नोकिलेसं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे…. (१)

नोकिलेसं धम्मं पटिच्च किलेसो धम्मो उप्पज्जति हेतुपच्चया – नोकिलेसे खन्धे पटिच्च किलेसा. (२)

नोकिलेसं धम्मं पटिच्च किलेसो च नोकिलेसो च धम्मा उप्पज्जन्ति हेतुपच्चया – नोकिलेसं एकं खन्धं पटिच्च तयो खन्धा किलेसा च चित्तसमुट्ठानञ्च रूपं…पे… द्वे खन्धे…पे…. (३)

३. किलेसञ्च नोकिलेसञ्च धम्मं पटिच्च किलेसो धम्मो उप्पज्जति हेतुपच्चया – लोभञ्च सम्पयुत्तके च खन्धे पटिच्च मोहो दिट्ठि थिनं उद्धच्चं अहिरिकं अनोत्तप्पं (चक्कं). (१)

किलेसञ्च नोकिलेसञ्च धम्मं पटिच्च नोकिलेसो धम्मो उप्पज्जति हेतुपच्चया – नोकिलेसं एकं खन्धञ्च किलेसे च पटिच्च तयो खन्धा चित्तसमुट्ठानञ्च रूपं…पे… द्वे खन्धे च…पे… किलेसे च महाभूते च पटिच्च चित्तसमुट्ठानं रूपं. (२)

किलेसञ्च नोकिलेसञ्च धम्मं पटिच्च किलेसो च नोकिलेसो च धम्मा उप्पज्जन्ति हेतुपच्चया – नोकिलेसं एकं खन्धञ्च लोभञ्च पटिच्च तयो खन्धा मोहो दिट्ठि थिनं उद्धच्चं अहिरिकं अनोत्तप्पं चित्तसमुट्ठानञ्च रूपं…पे… द्वे खन्धे च…पे… (चक्कं, संखित्तं). (३)