७. पञ्हावारो

पच्चयचतुक्कं

हेतुपच्चयो

३४. हेतु अकुसलो धम्मो हेतुस्स अकुसलस्स धम्मस्स हेतुपच्चयेन पच्चयो. हेतु अकुसलो धम्मो नहेतुस्स अकुसलस्स धम्मस्स हेतुपच्चयेन पच्चयो. हेतु अकुसलो धम्मो हेतुस्स अकुसलस्स च नहेतुस्स अकुसलस्स च धम्मस्स हेतुपच्चयेन पच्चयो. (३)

आरम्मणपच्चयादि

३५. हेतु अकुसलो धम्मो हेतुस्स अकुसलस्स धम्मस्स आरम्मणपच्चयेन पच्चयो… तीणि.

नहेतु अकुसलो धम्मो नहेतुस्स अकुसलस्स धम्मस्स आरम्मणपच्चयेन पच्चयो… तीणि.

हेतु अकुसलो च नहेतु अकुसलो च धम्मा हेतुस्स अकुसलस्स धम्मस्स आरम्मणपच्चयेन पच्चयो… तीणि.

३६. हेतु अकुसलो धम्मो हेतुस्स अकुसलस्स धम्मस्स अधिपतिपच्चयेन पच्चयो – आरम्मणाधिपति… तीणि.

नहेतु अकुसलो धम्मो नहेतुस्स अकुसलस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति… तीणि.

हेतु अकुसलो च नहेतु अकुसलो च धम्मा हेतुस्स अकुसलस्स धम्मस्स अधिपतिपच्चयेन पच्चयो – आरम्मणाधिपति… तीणि…पे….

३७. नहेतु अकुसलो धम्मो नहेतुस्स अकुसलस्स धम्मस्स कम्मपच्चयेन पच्चयो. नहेतु अकुसलो धम्मो हेतुस्स अकुसलस्स धम्मस्स कम्मपच्चयेन पच्चयो. नहेतु अकुसलो धम्मो हेतुस्स अकुसलस्स च नहेतुस्स अकुसलस्स च धम्मस्स कम्मपच्चयेन पच्चयो. (३)

आहारपच्चयादि

३८. नहेतु अकुसलो धम्मो नहेतुस्स अकुसलस्स धम्मस्स आहारपच्चयेन पच्चयो… तीणि.

३९. नहेतु अकुसलो धम्मो नहेतुस्स अकुसलस्स धम्मस्स इन्द्रियपच्चयेन पच्चयो… तीणि.

४०. नहेतु अकुसलो धम्मो नहेतुस्स अकुसलस्स धम्मस्स झानपच्चयेन पच्चयो… तीणि (संखित्तं).

४१. हेतुया तीणि, आरम्मणे नव, अधिपतिया नव, अनन्तरे नव, समनन्तरे नव, सहजाते नव, अञ्ञमञ्ञे नव, निस्सये नव, उपनिस्सये नव, आसेवने नव, कम्मे तीणि, आहारे तीणि, इन्द्रिये तीणि, झाने तीणि, मग्गे तीणि, सम्पयुत्ते नव, अत्थिया नव, नत्थिया नव, विगते नव, अविगते नव.

पच्चनीयुद्धारो

४२. हेतु अकुसलो धम्मो हेतुस्स अकुसलस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो (संखित्तं).

४३. नहेतुया नव, नआरम्मणे नव, नअधिपतिया नव, नअनन्तरे नव, नसमनन्तरे नव, नसहजाते नव, नअञ्ञमञ्ञे नव…पे… नोअविगते नव (पच्चनीयं).

हेतुपच्चया नआरम्मणे तीणि (संखित्तं, अनुलोमपच्चनीयं).

नहेतुपच्चया आरम्मणे नव (संखित्तं, पच्चनीयानुलोमं).

(यथा कुसलत्तिके पञ्हावारस्स अनुलोमम्पि पच्चनीयम्पि अनुलोमपच्चनीयम्पि पच्चनीयानुलोमम्पि गणितं, एवं गणेतब्बं.)