७. पञ्हावारो

पच्चयचतुक्कं

हेतुपच्चयो

१२. हेतु कुसलो धम्मो हेतुस्स कुसलस्स धम्मस्स हेतुपच्चयेन पच्चयो. हेतु कुसलो धम्मो नहेतुस्स कुसलस्स धम्मस्स हेतुपच्चयेन पच्चयो. हेतु कुसलो धम्मो हेतुस्स कुसलस्स च नहेतुस्स कुसलस्स च धम्मस्स हेतुपच्चयेन पच्चयो. (३)

आरम्मणपच्चयादि

१३. हेतु कुसलो धम्मो हेतुस्स कुसलस्स धम्मस्स आरम्मणपच्चयेन पच्चयो… तीणि.

नहेतु कुसलो धम्मो नहेतुस्स कुसलस्स धम्मस्स आरम्मणपच्चयेन पच्चयो… तीणि.

हेतु कुसलो च नहेतु कुसलो च धम्मा हेतुस्स कुसलस्स धम्मस्स आरम्मणपच्चयेन पच्चयो… तीणि.

१४. हेतु कुसलो धम्मो हेतुस्स कुसलस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति… तीणि.

नहेतु कुसलो धम्मो नहेतुस्स कुसलस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति… तीणि.

हेतु कुसलो च नहेतु कुसलो च धम्मा हेतुस्स कुसलस्स धम्मस्स अधिपतिपच्चयेन पच्चयो – आरम्मणाधिपति… तीणि.

अनन्तरपच्चयादि

१५. हेतु कुसलो धम्मो हेतुस्स कुसलस्स धम्मस्स अनन्तरपच्चयेन पच्चयो… समनन्तरपच्चयेन पच्चयो… सहजातपच्चयेन पच्चयो… अञ्ञमञ्ञपच्चयेन पच्चयो… निस्सयपच्चयेन पच्चयो.

१६. हेतु कुसलो धम्मो हेतुस्स कुसलस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो… तीणि.

नहेतु कुसलो धम्मो नहेतुस्स कुसलस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो… तीणि.

हेतु कुसलो च नहेतु कुसलो च धम्मा हेतुस्स कुसलस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो… तीणि, आसेवनपच्चयेन पच्चयो… नव.

१७. नहेतु कुसलो धम्मो नहेतुस्स कुसलस्स धम्मस्स कम्मपच्चयेन पच्चयो. नहेतु कुसलो धम्मो हेतुस्स कुसलस्स धम्मस्स कम्मपच्चयेन पच्चयो. नहेतु कुसलो धम्मो हेतुस्स कुसलस्स च नहेतुस्स कुसलस्स च धम्मस्स कम्मपच्चयेन पच्चयो. (३)

आहारपच्चयादि

१८. नहेतु कुसलो धम्मो नहेतुस्स कुसलस्स धम्मस्स आहारपच्चयेन पच्चयो… तीणि.

१९. हेतु कुसलो धम्मो हेतुस्स कुसलस्स धम्मस्स इन्द्रियपच्चयेन पच्चयो… नव.

२०. नहेतु कुसलो धम्मो नहेतुस्स कुसलस्स धम्मस्स झानपच्चयेन पच्चयो… तीणि.

२१. हेतु कुसलो धम्मो हेतुस्स कुसलस्स धम्मस्स मग्गपच्चयेन पच्चयो… नव.

२२. हेतुया तीणि, आरम्मणे नव, अधिपतिया नव, अनन्तरे नव, समनन्तरे नव, सहजाते नव, अञ्ञमञ्ञे नव, निस्सये नव, उपनिस्सये नव, आसेवने नव, कम्मे तीणि, आहारे तीणि, इन्द्रिये नव, झाने तीणि, मग्गे नव, सम्पयुत्ते नव, अत्थिया नव, नत्थिया नव, विगते नव, अविगते नव.

पच्चनीयुद्धारो

२३. हेतु कुसलो धम्मो हेतुस्स कुसलस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… तीणि.

२४. नहेतु कुसलो धम्मो नहेतुस्स कुसलस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो. नहेतु कुसलो धम्मो हेतुस्स कुसलस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो. नहेतु कुसलो धम्मो हेतुस्स कुसलस्स च नहेतुस्स कुसलस्स च धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो. (३)

२५. हेतु कुसलो च नहेतु कुसलो च धम्मा हेतुस्स कुसलस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… तीणि. (३)

२६. नहेतुया नव, नआरम्मणे नव, नअधिपतिया नव…पे… नोअविगते नव (संखित्तं, पच्चनीयं).

हेतुपच्चया नआरम्मणे तीणि…पे… नोनत्थिया तीणि, नोविगते तीणि (संखित्तं, अनुलोमपच्चनीयं).

नहेतुपच्चया आरम्मणे नव…पे… अविगते नव (संखित्तं, पच्चनीयानुलोमं).

(यथा कुसलत्तिके पञ्हावारस्स अनुलोमम्पि पच्चनीयम्पि अनुलोमपच्चनीयम्पि पच्चनीयानुलोमम्पि गणितं, एवं गणेतब्बं.)