७. पञ्हावारो

पच्चयचतुक्कं

हेतुपच्चयादि

५३७. हेतु बहिद्धारम्मणो धम्मो हेतुस्स बहिद्धारम्मणस्स धम्मस्स हेतुपच्चयेन पच्चयो… तीणि.

हेतु बहिद्धारम्मणो धम्मो हेतुस्स बहिद्धारम्मणस्स धम्मस्स आरम्मणपच्चयेन पच्चयो… नव.

हेतु बहिद्धारम्मणो धम्मो हेतुस्स बहिद्धारम्मणस्स धम्मस्स अधिपतिपच्चयेन पच्चयो – सहजाताधिपति… तीणि.

नहेतु बहिद्धारम्मणो धम्मो नहेतुस्स बहिद्धारम्मणस्स धम्मस्स अधिपतिपच्चयेन पच्चयो – सहजाताधिपति… तीणि (संखित्तं).

५३८. हेतुया तीणि, आरम्मणे नव, अधिपतिया छ, कम्मे तीणि, विपाके नव, आहारे तीणि…पे… अविगते नव (संखित्तं).

पच्चनीयुद्धारो

५३९. हेतु बहिद्धारम्मणो धम्मो हेतुस्स बहिद्धारम्मणस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो (संखित्तं).

५४०. नहेतुया नव, नआरम्मणे नव (संखित्तं).

हेतुपच्चया नआरम्मणे तीणि (संखित्तं).

नहेतुपच्चया आरम्मणे नव (संखित्तं).

(यथा कुसलत्तिके पञ्हावारस्स अनुलोमम्पि पच्चनीयम्पि अनुलोमपच्चनीयम्पि पच्चनीयानुलोमम्पि गणितं, एवं गणेतब्बं.)

हेतुदुकअज्झत्तारम्मणत्तिकं निट्ठितं.