७. पञ्हावारो

पच्चयचतुक्कं

हेतुपच्चयादि

३७५. हेतु अप्पमाणो धम्मो हेतुस्स अप्पमाणस्स धम्मस्स हेतुपच्चयेन पच्चयो… तीणि.

नहेतु अप्पमाणो धम्मो नहेतुस्स अप्पमाणस्स धम्मस्स आरम्मणपच्चयेन पच्चयो… तीणि.

३७६. हेतु अप्पमाणो धम्मो हेतुस्स अप्पमाणस्स धम्मस्स अधिपतिपच्चयेन पच्चयो – सहजाताधिपति… तीणि.

नहेतु अप्पमाणो धम्मो नहेतुस्स अप्पमाणस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति… तीणि.

३७७. हेतु अप्पमाणो धम्मो हेतुस्स अप्पमाणस्स धम्मस्स अनन्तरपच्चयेन पच्चयो… नव…पे….

हेतु अप्पमाणो धम्मो हेतुस्स अप्पमाणस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो… नव (संखित्तं).

३७८. हेतुया तीणि, आरम्मणे तीणि, अधिपतिया छ, अनन्तरे नव, समनन्तरे नव, सहजाते नव, अञ्ञमञ्ञे नव, निस्सये नव, उपनिस्सये नव, कम्मे तीणि, विपाके नव, आहारे तीणि, इन्द्रिये नव, झाने तीणि, मग्गे नव, सम्पयुत्ते नव, अत्थिया नव, नत्थिया नव, विगते नव, अविगते नव (संखित्तं).

पच्चनीयुद्धारो

३७९. हेतु अप्पमाणो धम्मो हेतुस्स अप्पमाणस्स धम्मस्स सहजातपच्चयेन पच्चयो… उपनिस्सयपच्चयेन पच्चयो (संखित्तं).

३८०. नहेतुया नव, नआरम्मणे नव (संखित्तं).

हेतुपच्चया नआरम्मणे तीणि (संखित्तं).

नहेतुपच्चया आरम्मणे तीणि (संखित्तं).

(यथा कुसलत्तिके पञ्हावारस्स अनुलोमम्पि पच्चनीयम्पि अनुलोमपच्चनीयम्पि पच्चनीयानुलोमम्पि गणितं, एवं गणेतब्बं.)

हेतुदुकपरित्तत्तिकं निट्ठितं.