१. विभङ्गवारो

हेतुपच्चयो

३४९. सरणो धम्मो सरणस्स धम्मस्स हेतुपच्चयेन पच्चयो (अरूपदुकसदिसं, चत्तारि).

आरम्मणपच्चयो

३५०. सरणो धम्मो सरणस्स धम्मस्स आरम्मणपच्चयेन पच्चयो – रागं अस्सादेति अभिनन्दति, तं आरब्भ रागो उप्पज्जति, दिट्ठि…पे… विचिकिच्छा…पे… उद्धच्चं…पे… दोमनस्सं उप्पज्जति, दिट्ठिं अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति, विचिकिच्छं आरब्भ …पे… उद्धच्चं आरब्भ…पे… दोमनस्सं आरब्भ दोमनस्सं उप्पज्जति, दिट्ठि…पे… विचिकिच्छा…पे… उद्धच्चं उप्पज्जति. सरणो धम्मो अरणस्स धम्मस्स आरम्मणपच्चयेन पच्चयो – अरिया पहीने किलेसे…पे… विक्खम्भिते किलेसे…पे… पुब्बे समुदाचिण्णे…पे… सरणे खन्धे अनिच्चतो…पे… विपस्सति, चेतोपरियञाणेन सरणचित्तसमङ्गिस्स चित्तं जानाति. सरणा खन्धा चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

३५१. अरणो धम्मो अरणस्स धम्मस्स आरम्मणपच्चयेन पच्चयो; दानं…पे… सीलं…पे… उपोसथकम्मं कत्वा तं पच्चवेक्खति, पुब्बे…पे… झाना…पे… अरिया मग्गा वुट्ठहित्वा मग्गं पच्चवेक्खन्ति, फलं…पे… निब्बानं पच्चवेक्खन्ति; निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो. चक्खुं…पे… वत्थुं अरणे खन्धे अनिच्चतो…पे… विपस्सति, दिब्बेन चक्खुना रूपं पस्सति …पे… अनागतंसञाणस्स, आवज्जनाय आरम्मणपच्चयेन पच्चयो. अरणो धम्मो सरणस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं अस्सादेति अभिनन्दति, तं आरब्भ रागो उप्पज्जति…पे… पुब्बे…पे… झाना…पे… चक्खुं…पे… वत्थुं, अरणे खन्धे अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति. (२)

अधिपतिपच्चयो

३५२. सरणो धम्मो सरणस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – रागं गरुं कत्वा अस्सादेति अभिनन्दति, तं गरुं कत्वा रागो उप्पज्जति… दिट्ठि उप्पज्जति; दिट्ठिं गरुं कत्वा अस्सादेति अभिनन्दति. सहजाताधिपति – सरणाधिपति सम्पयुत्तकानं खन्धानं अधिपतिपच्चयेन पच्चयो. सरणो धम्मो अरणस्स धम्मस्स अधिपतिपच्चयेन पच्चयो. सहजाताधिपति – सरणाधिपति चित्तसमुट्ठानानं रूपानं अधिपतिपच्चयेन पच्चयो. सरणो धम्मो सरणस्स च अरणस्स च धम्मस्स अधिपतिपच्चयेन पच्चयो. सहजाताधिपति – सरणाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

३५३. अरणो धम्मो अरणस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं …पे… उपोसथकम्मं कत्वा तं गरुं कत्वा पच्चवेक्खति, पुब्बे…पे… झाना…पे… अरिया मग्गा वुट्ठहित्वा मग्गं गरुं कत्वा पच्चवेक्खन्ति, फलं…पे… निब्बानं गरुं कत्वा पच्चवेक्खन्ति, निब्बानं गोत्रभुस्स, वोदानस्स, मग्गस्स, फलस्स, अधिपतिपच्चयेन पच्चयो. सहजाताधिपति – अरणाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. अरणो धम्मो सरणस्स धम्मस्स अधिपतिपच्चयेन पच्चयो. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा अस्सादेति अभिनन्दति, तं गरुं कत्वा रागो उप्पज्जति… दिट्ठि उप्पज्जति; पुब्बे सुचिण्णानि…पे… झाना…पे… चक्खुं…पे… वत्थुं, अरणे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति… दिट्ठि उप्पज्जति. (२)

अनन्तरपच्चयादि

३५४. सरणो धम्मो सरणस्स धम्मस्स अनन्तरपच्चयेन पच्चयो – पुरिमा पुरिमा सरणा खन्धा पच्छिमानं पच्छिमानं सरणानं खन्धानं अनन्तरपच्चयेन पच्चयो. सरणो धम्मो अरणस्स धम्मस्स अनन्तरपच्चयेन पच्चयो – सरणा खन्धा वुट्ठानस्स अनन्तरपच्चयेन पच्चयो. (२)

३५५. अरणो धम्मो अरणस्स धम्मस्स अनन्तरपच्चयेन पच्चयो – पुरिमा पुरिमा अरणा खन्धा पच्छिमानं पच्छिमानं अरणानं खन्धानं अनन्तरपच्चयेन पच्चयो; अनुलोमं गोत्रभुस्स…पे… फलसमापत्तिया अनन्तरपच्चयेन पच्चयो. अरणो धम्मो सरणस्स धम्मस्स अनन्तरपच्चयेन पच्चयो – आवज्जना सरणानं खन्धानं अनन्तरपच्चयेन पच्चयो. (२)

समनन्तरपच्चयेन पच्चयो… सहजातपच्चयेन पच्चयो… पञ्च… अञ्ञमञ्ञपच्चयेन पच्चयो… द्वे… निस्सयपच्चयेन पच्चयो… सत्त.

उपनिस्सयपच्चयो

३५६. सरणो धम्मो सरणस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – रागं उपनिस्साय पाणं हनति…पे… सङ्घं भिन्दति; दोसं…पे… पत्थनं उपनिस्साय पाणं हनति…पे… सङ्घं भिन्दति, रागो…पे… पत्थना रागस्स…पे… पत्थनाय उपनिस्सयपच्चयेन पच्चयो. सरणो धम्मो अरणस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – रागं उपनिस्साय दानं देति, सीलं…पे… उपोसथकम्मं करोति, झानं उप्पादेति, विपस्सनं…पे… मग्गं…पे… अभिञ्ञं…पे… समापत्तिं उप्पादेति; दोसं…पे… पत्थनं उपनिस्साय दानं देति…पे… समापत्तिं उप्पादेति, रागो…पे… पत्थना सद्धाय…पे… पञ्ञाय… कायिकस्स सुखस्स… कायिकस्स दुक्खस्स… मग्गस्स… फलसमापत्तिया उपनिस्सयपच्चयेन पच्चयो. (२)

३५७. अरणो धम्मो अरणस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… समापत्तिं उप्पादेति; सीलं…पे… पञ्ञं… कायिकं सुखं… कायिकं दुक्खं… उतुं… भोजनं… सेनासनं उपनिस्साय दानं देति…पे… समापत्तिं उप्पादेति; सद्धा …पे… सेनासनं सद्धाय…पे… पञ्ञाय… कायिकस्स सुखस्स… कायिकस्स दुक्खस्स… मग्गस्स… फलसमापत्तिया उपनिस्सयपच्चयेन पच्चयो. (१)

अरणो धम्मो सरणस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय मानं जप्पेति, दिट्ठिं गण्हाति; सीलं…पे… सेनासनं उपनिस्साय पाणं हनति…पे… सङ्घं भिन्दति; सद्धा…पे… सेनासनं रागस्स…पे… पत्थनाय उपनिस्सयपच्चयेन पच्चयो. (२)

पुरेजातपच्चयादि

३५८. अरणो धम्मो अरणस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… विपस्सति…पे… दिब्बेन चक्खुना रूपं पस्सति, दिब्बाय सोतधातुया सद्दं सुणाति, रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स …पे… कायायतनं कायविञ्ञाणस्स…पे… वत्थु अरणानं खन्धानं पुरेजातपच्चयेन पच्चयो. अरणो धम्मो सरणस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति. वत्थुपुरेजातं – वत्थु सरणानं खन्धानं पुरेजातपच्चयेन पच्चयो. (२)

पच्छाजातपच्चयेन पच्चयो… द्वे… आसेवनपच्चयेन पच्चयो… द्वे.

कम्मपच्चयो

३५९. सरणो धम्मो सरणस्स धम्मस्स कम्मपच्चयेन पच्चयो – सरणा चेतना सम्पयुत्तकानं खन्धानं कम्मपच्चयेन पच्चयो. (मूलं कातब्बं.) सहजाता, नानाक्खणिका. सहजाता – सरणा चेतना चित्तसमुट्ठानानं रूपानं कम्मपच्चयेन पच्चयो. नानाक्खणिका – सरणा चेतना विपाकानं खन्धानं कटत्ता च रूपानं कम्मपच्चयेन पच्चयो. (मूलं कातब्बं.) सरणा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

अरणो धम्मो अरणस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – (संखित्तं). (१)

विपाकपच्चयेन पच्चयो… एकं… आहारपच्चयेन पच्चयो… चत्तारि… इन्द्रियपच्चयेन पच्चयो… चत्तारि… झानपच्चयेन पच्चयो… चत्तारि… मग्गपच्चयेन पच्चयो… चत्तारि… सम्पयुत्तपच्चयेन पच्चयो… द्वे… विप्पयुत्तपच्चयेन पच्चयो… तीणि (अरूपदुकसदिसा).

अत्थिपच्चयो

३६०. सरणो धम्मो सरणस्स धम्मस्स अत्थिपच्चयेन पच्चयो (संखित्तं). सरणो धम्मो अरणस्स धम्मस्स अत्थिपच्चयेन पच्चयो – सहजातं, पच्छाजातं (संखित्तं). सरणो धम्मो सरणस्स च अरणस्स च धम्मस्स अत्थिपच्चयेन पच्चयो (संखित्तं). (३)

३६१. अरणो धम्मो अरणस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). अरणो धम्मो सरणस्स धम्मस्स अत्थिपच्चयेन पच्चयो. पुरेजातं – चक्खुं …पे… वत्थुं अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति, वत्थु सरणानं खन्धानं अत्थिपच्चयेन पच्चयो. (२)

सरणो च अरणो च धम्मा सरणस्स धम्मस्स अत्थिपच्चयेन पच्चयो – सहजातं, पुरेजातं (संखित्तं). सरणो च अरणो च धम्मा अरणस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – सरणा खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. पच्छाजाता – सरणा खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – सरणा खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)