१-४. पच्चयचतुक्कं

३४७. सरणं धम्मं पच्चया सरणो धम्मो उप्पज्जति हेतुपच्चया – सरणं एकं खन्धं पच्चया तयो खन्धा…पे… द्वे खन्धे…पे… (यथा अरूपावचरदुकस्स पच्चयवारोपि एवं कातब्बो).

हेतुया नव, आरम्मणे चत्तारि, अधिपतिया नव…पे… अविगते नव.

अनुलोमं.

३४८. सरणं धम्मं पच्चया सरणो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पच्चया विचिकिच्छासहगतो उद्धच्चसहगतो मोहो. (१)

अरणं धम्मं पच्चया अरणो धम्मो उप्पज्जति नहेतुपच्चया – अहेतुकं अरणं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… (याव असञ्ञसत्ता) चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका खन्धा. अरणं धम्मं पच्चया सरणो धम्मो उप्पज्जति नहेतुपच्चया – वत्थुं पच्चया विचिकिच्छासहगतो उद्धच्चसहगतो मोहो. (२)

सरणञ्च अरणञ्च धम्मं पच्चया सरणो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)

नहेतुया चत्तारि, नआरम्मणे तीणि, नअधिपतिया नव, नअनन्तरे तीणि, नसमनन्तरे तीणि, नअञ्ञमञ्ञे तीणि, नउपनिस्सये तीणि, नपुरेजाते चत्तारि, नपच्छाजाते नव, नआसेवने नव, नकम्मे चत्तारि, नविपाके नव, नआहारे एकं, नइन्द्रिये एकं, नझाने एकं, नमग्गे एकं, नसम्पयुत्ते तीणि, नविप्पयुत्ते द्वे, नोनत्थिया तीणि, नोविगते तीणि.

पच्चनीयं.