१. विभङ्गवारो

हेतुपच्चयो

३१३. निय्यानिको धम्मो निय्यानिकस्स धम्मस्स हेतुपच्चयेन पच्चयो – निय्यानिका हेतू सम्पयुत्तकानं खन्धानं हेतुपच्चयेन पच्चयो. (मूलं कातब्बं.) निय्यानिका हेतू चित्तसमुट्ठानानं रूपानं हेतुपच्चयेन पच्चयो. (मूलं कातब्बं.) निय्यानिका हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (३)

अनिय्यानिको धम्मो अनिय्यानिकस्स धम्मस्स हेतुपच्चयेन पच्चयो – अनिय्यानिका हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

आरम्मणपच्चयो

३१४. निय्यानिको धम्मो अनिय्यानिकस्स धम्मस्स आरम्मणपच्चयेन पच्चयो – अरिया मग्गा वुट्ठहित्वा मग्गं पच्चवेक्खन्ति, चेतोपरियञाणेन निय्यानिकचित्तसमङ्गिस्स चित्तं जानाति, निय्यानिका खन्धा चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अनिय्यानिको धम्मो अनिय्यानिकस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति; पुब्बे सुचिण्णानि…पे… झाना…पे… अरिया फलं पच्चवेक्खन्ति, निब्बानं पच्चवेक्खन्ति, निब्बानं गोत्रभुस्स, वोदानस्स, फलस्स, आवज्जनाय आरम्मणपच्चयेन पच्चयो; अरिया पहीने किलेसे…पे… विक्खम्भिते…पे… पुब्बे समुदाचिण्णे…पे… चक्खुं…पे… वत्थुं अनिय्यानिके खन्धे अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति, चेतोपरियञाणेन अनिय्यानिकचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… अनिय्यानिका खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो.

अनिय्यानिको धम्मो निय्यानिकस्स धम्मस्स आरम्मणपच्चयेन पच्चयो – निब्बानं मग्गस्स आरम्मणपच्चयेन पच्चयो. (२)

अधिपतिपच्चयो

३१५. निय्यानिको धम्मो निय्यानिकस्स धम्मस्स अधिपतिपच्चयेन पच्चयो. सहजाताधिपति – निय्यानिकाधिपति सम्पयुत्तकानं खन्धानं अधिपतिपच्चयेन पच्चयो. निय्यानिको धम्मो अनिय्यानिकस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – अरिया मग्गा वुट्ठहित्वा मग्गं गरुं कत्वा पच्चवेक्खन्ति. सहजाताधिपति – निय्यानिकाधिपति चित्तसमुट्ठानानं रूपानं अधिपतिपच्चयेन पच्चयो. (मूलं कातब्बं.) निय्यानिकाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

३१६. अनिय्यानिको धम्मो अनिय्यानिकस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा पच्चवेक्खति अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति, पुब्बे सुचिण्णानि…पे… झाना वुट्ठहित्वा…पे… अरिया फलं गरुं कत्वा पच्चवेक्खन्ति, निब्बानं गरुं कत्वा पच्चवेक्खन्ति, निब्बानं गोत्रभुस्स, वोदानस्स, फलस्स अधिपतिपच्चयेन पच्चयो; चक्खुं…पे… वत्थुं अनिय्यानिके खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – अनिय्यानिकाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. अनिय्यानिको धम्मो निय्यानिकस्स धम्मस्स अधिपतिपच्चयेन पच्चयो. आरम्मणाधिपति – निब्बानं मग्गस्स अधिपतिपच्चयेन पच्चयो. (२)

अनन्तरपच्चयादि

३१७. निय्यानिको धम्मो अनिय्यानिकस्स धम्मस्स अनन्तरपच्चयेन पच्चयो – मग्गो फलस्स अनन्तरपच्चयेन पच्चयो. (१)

अनिय्यानिको धम्मो अनिय्यानिकस्स धम्मस्स अनन्तरपच्चयेन पच्चयो – पुरिमा पुरिमा अनिय्यानिका खन्धा पच्छिमानं पच्छिमानं अनिय्यानिकानं खन्धानं अनन्तरपच्चयेन पच्चयो; अनुलोमं गोत्रभुस्स… अनुलोमं वोदानस्स… फलं फलस्स… अनुलोमं फलसमापत्तिया … निरोधा वुट्ठहन्तस्स नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. अनिय्यानिको धम्मो निय्यानिकस्स धम्मस्स अनन्तरपच्चयेन पच्चयो… गोत्रभु मग्गस्स; वोदानं मग्गस्स अनन्तरपच्चयेन पच्चयो. (२)

समनन्तरपच्चयेन पच्चयो… सहजातपच्चयेन पच्चयो… पञ्च… अञ्ञमञ्ञपच्चयेन पच्चयो… द्वे… निस्सयपच्चयेन पच्चयो… सत्त.

उपनिस्सयपच्चयो

३१८. निय्यानिको धम्मो निय्यानिकस्स धम्मस्स उपनिस्सयपच्चयेन पच्चयो. पकतूपनिस्सयो – पठमो मग्गो दुतियस्स मग्गस्स उपनिस्सयपच्चयेन पच्चयो…पे… ततियो मग्गो चतुत्थस्स मग्गस्स उपनिस्सयपच्चयेन पच्चयो. निय्यानिको धम्मो अनिय्यानिकस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अरिया मग्गं उपनिस्साय अनुप्पन्नं समापत्तिं उप्पादेन्ति, उप्पन्नं समापज्जन्ति, सङ्खारे अनिच्चतो…पे… विपस्सन्ति, मग्गो अरियानं अत्थपटिसम्भिदाय…पे… पटिभानपटिसम्भिदाय ठानाठानकोसल्लस्स उपनिस्सयपच्चयेन पच्चयो, मग्गो फलसमापत्तिया उपनिस्सयपच्चयेन पच्चयो. (२)

३१९. अनिय्यानिको धम्मो अनिय्यानिकस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अनिय्यानिकं सद्धं उपनिस्साय दानं देति, सीलं…पे… उपोसथकम्मं करोति, झानं उप्पादेति… विपस्सनं… अभिञ्ञं… समापत्तिं उप्पादेति… मानं जप्पेति… दिट्ठिं गण्हाति; अनिय्यानिकं सीलं…पे… पञ्ञं… रागं…पे… पत्थनं… उतुं… भोजनं… सेनासनं उपनिस्साय दानं देति…पे… समापत्तिं उप्पादेति, पाणं हनति…पे… सङ्घं भिन्दति; अनिय्यानिका सद्धा…पे… सेनासनं अनिय्यानिकाय सद्धाय…पे… पत्थनाय… कायिकस्स सुखस्स… कायिकस्स दुक्खस्स… फलसमापत्तिया उपनिस्सयपच्चयेन पच्चयो. अनिय्यानिको धम्मो निय्यानिकस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – पठमस्स मग्गस्स परिकम्मं पठमस्स मग्गस्स उपनिस्सयपच्चयेन पच्चयो…पे… चतुत्थस्स मग्गस्स परिकम्मं चतुत्थस्स मग्गस्स उपनिस्सयपच्चयेन पच्चयो. (२)

पुरेजातपच्चयादि

३२०. अनिय्यानिको धम्मो अनिय्यानिकस्स धम्मस्स पुरेजातपच्चयेन पच्चयो… द्वे (अरूपदुकसदिसा कातब्बा)… पच्छाजातपच्चयेन पच्चयो… द्वे… आसेवनपच्चयेन पच्चयो… द्वे.

कम्मपच्चयो

३२१. निय्यानिको धम्मो निय्यानिकस्स धम्मस्स कम्मपच्चयेन पच्चयो – निय्यानिका चेतना सम्पयुत्तकानं खन्धानं कम्मपच्चयेन पच्चयो. निय्यानिको धम्मो अनिय्यानिकस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – निय्यानिका चेतना चित्तसमुट्ठानानं रूपानं कम्मपच्चयेन पच्चयो. नानाक्खणिका – निय्यानिका चेतना फलस्स कम्मपच्चयेन पच्चयो. (मूलं कातब्बं) निय्यानिका चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

३२२. अनिय्यानिको धम्मो अनिय्यानिकस्स धम्मस्स कम्मपच्चयेन पच्चयो – सहजाता, नानाक्खणिका. सहजाता (संखित्तं). नानाक्खणिका – अनिय्यानिका चेतना विपाकानं खन्धानं कटत्ता च रूपानं कम्मपच्चयेन पच्चयो… विपाकपच्चयेन पच्चयो… एकंयेव… आहारपच्चयेन पच्चयो… चत्तारि… इन्द्रियपच्चयेन पच्चयो… चत्तारि… झानपच्चयेन पच्चयो… चत्तारि… मग्गपच्चयेन पच्चयो… चत्तारि… सम्पयुत्तपच्चयेन पच्चयो… द्वे… विप्पयुत्तपच्चयेन पच्चयो… तीणि (अरूपदुकसदिसा कातब्बा)… अत्थिपच्चयेन पच्चयो… सत्त (अरूपदुकसदिसा कातब्बा, आमसना नानापदायेव)… नत्थिपच्चयेन पच्चयो… तीणि… विगतपच्चयेन पच्चयो… तीणि… अविगतपच्चयेन पच्चयो… सत्त.