१. विभङ्गवारो

हेतुपच्चयो

३०६. निय्यानिकं धम्मं पच्चया निय्यानिको धम्मो उप्पज्जति हेतुपच्चया… तीणि (पटिच्चसदिसा).

अनिय्यानिकं धम्मं पच्चया अनिय्यानिको धम्मो उप्पज्जति हेतुपच्चया – अनिय्यानिकं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… (याव अज्झत्तिका महाभूता) वत्थुं पच्चया अनिय्यानिका खन्धा. अनिय्यानिकं धम्मं पच्चया निय्यानिको धम्मो उप्पज्जति हेतुपच्चया – वत्थुं पच्चया निय्यानिका खन्धा. अनिय्यानिकं धम्मं पच्चया निय्यानिको च अनिय्यानिको च धम्मा उप्पज्जन्ति हेतुपच्चया – वत्थुं पच्चया निय्यानिका खन्धा, महाभूते पच्चया चित्तसमुट्ठानं रूपं. (३)

३०७. निय्यानिकञ्च अनिय्यानिकञ्च धम्मं पच्चया निय्यानिको धम्मो उप्पज्जति हेतुपच्चया – निय्यानिकं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे…. निय्यानिकञ्च अनिय्यानिकञ्च धम्मं पच्चया अनिय्यानिको धम्मो उप्पज्जति हेतुपच्चया – निय्यानिके खन्धे च महाभूते च पच्चया चित्तसमुट्ठानं रूपं. निय्यानिकञ्च अनिय्यानिकञ्च धम्मं पच्चया निय्यानिको च अनिय्यानिको च धम्मा उप्पज्जन्ति हेतुपच्चया – निय्यानिकं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… निय्यानिके खन्धे च महाभूते च पच्चया चित्तसमुट्ठानं रूपं. (३)