१. विभङ्गवारो

नहेतु-नआरम्मणपच्चया

३०२. अनिय्यानिकं धम्मं पटिच्च अनिय्यानिको धम्मो उप्पज्जति नहेतुपच्चया – अहेतुकं अनिय्यानिकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे… (याव असञ्ञसत्ता) विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१) नआरम्मणपच्चया… तीणि.

नअधिपतिपच्चयादि

३०३. निय्यानिकं धम्मं पटिच्च निय्यानिको धम्मो उप्पज्जति नअधिपतिपच्चया – निय्यानिके खन्धे पटिच्च निय्यानिकाधिपति. (१)

अनिय्यानिकं धम्मं पटिच्च अनिय्यानिको धम्मो उप्पज्जति नअधिपतिपच्चया – अनिय्यानिकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… (याव असञ्ञसत्ता कातब्बा). (१)

नअनन्तरपच्चया… नसमनन्तरपच्चया… नअञ्ञमञ्ञपच्चया…पे….

नपुरेजातपच्चयो

३०४. निय्यानिकं धम्मं पटिच्च निय्यानिको धम्मो उप्पज्जति नपुरेजातपच्चया – अरूपे निय्यानिकं एकं खन्धं…पे…. निय्यानिकं धम्मं पटिच्च अनिय्यानिको धम्मो उप्पज्जति नपुरेजातपच्चया – निय्यानिके खन्धे पटिच्च चित्तसमुट्ठानं रूपं. (२)

अनिय्यानिकं धम्मं पटिच्च अनिय्यानिको धम्मो उप्पज्जति नपुरेजातपच्चया – अरूपे अनिय्यानिकं एकं खन्धं पटिच्च तयो खन्धा…पे… द्वे खन्धे…पे… अनिय्यानिके खन्धे पटिच्च चित्तसमुट्ठानं रूपं; पटिसन्धिक्खणे…पे… (याव असञ्ञसत्ता). (१)

निय्यानिकञ्च अनिय्यानिकञ्च धम्मं पटिच्च अनिय्यानिको धम्मो उप्पज्जति नपुरेजातपच्चया – निय्यानिके खन्धे च महाभूते च पटिच्च चित्तसमुट्ठानं रूपं. (१)