१. विभङ्गवारो

हेतुपच्चयो

२७९. अरूपावचरो धम्मो अरूपावचरस्स धम्मस्स हेतुपच्चयेन पच्चयो – अरूपावचरा हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे…पे…. (मूलं कातब्बं.) अरूपावचरा हेतू चित्तसमुट्ठानानं रूपानं हेतुपच्चयेन पच्चयो. (मूलं कातब्बं.) अरूपावचरा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (३)

नअरूपावचरो धम्मो नअरूपावचरस्स धम्मस्स हेतुपच्चयेन पच्चयो – नअरूपावचरा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

आरम्मणपच्चयो

२८०. अरूपावचरो धम्मो अरूपावचरस्स धम्मस्स आरम्मणपच्चयेन पच्चयो – आकासानञ्चायतनं विञ्ञाणञ्चायतनस्स आरम्मणपच्चयेन पच्चयो; आकिञ्चञ्ञायतनं नेवसञ्ञानासञ्ञायतनस्स आरम्मणपच्चयेन पच्चयो. अरूपावचरो धम्मो नअरूपावचरस्स धम्मस्स आरम्मणपच्चयेन पच्चयो – आकासानञ्चायतनं पच्चवेक्खति, विञ्ञाणञ्चायतनं…पे… आकिञ्चञ्ञायतनं…पे… नेवसञ्ञानासञ्ञायतनं पच्चवेक्खति, अरूपावचरे खन्धे अनिच्चतो…पे… दोमनस्सं उप्पज्जति; चेतोपरियञाणेन अरूपावचरचित्तसमङ्गिस्स चित्तं जानाति, अरूपावचरा खन्धा चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

नअरूपावचरो धम्मो नअरूपावचरस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति अस्सादेति अभिनन्दति, तं आरब्भ रागो…पे… दोमनस्सं उप्पज्जति; पुब्बे सुचिण्णानि…पे… झाना…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, निब्बानं पच्चवेक्खन्ति, निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; अरिया पहीने किलेसे पच्चवेक्खन्ति, विक्खम्भिते किलेसे…पे… पुब्बे…पे… चक्खुं…पे… वत्थुं नअरूपावचरे खन्धे अनिच्चतो…पे… दोमनस्सं उप्पज्जति, दिब्बेन चक्खुना रूपं पस्सति, दिब्बाय सोतधातुया सद्दं सुणाति, चेतोपरियञाणेन नअरूपावचरचित्तसमङ्गिस्स चित्तं जानाति, रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… नअरूपावचरा खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अधिपतिपच्चयो

२८१. अरूपावचरो धम्मो अरूपावचरस्स धम्मस्स अधिपतिपच्चयेन पच्चयो. सहजाताधिपति – अरूपावचराधिपति सम्पयुत्तकानं खन्धानं अधिपतिपच्चयेन पच्चयो. अरूपावचरो धम्मो नअरूपावचरस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – आकासानञ्चायतनं गरुं कत्वा पच्चवेक्खति…पे… नेवसञ्ञानासञ्ञायतनं गरुं कत्वा पच्चवेक्खति, अरूपावचरे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – अरूपावचराधिपति चित्तसमुट्ठानानं रूपानं अधिपतिपच्चयेन पच्चयो. (मूलं कातब्बं.) अरूपावचराधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

२८२. नअरूपावचरो धम्मो नअरूपावचरस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा पच्चवेक्खति अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति; पुब्बे सुचिण्णानि…पे… झाना…पे… अरिया मग्गा वुट्ठहित्वा मग्गं गरुं कत्वा पच्चवेक्खन्ति, फलं…पे… निब्बानं गरुं कत्वा पच्चवेक्खन्ति, निब्बानं गोत्रभुस्स, वोदानस्स, मग्गस्स, फलस्स अधिपतिपच्चयेन पच्चयो; चक्खुं…पे… वत्थुं नअरूपावचरे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नअरूपावचराधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

अनन्तरपच्चयादि

२८३. अरूपावचरो धम्मो अरूपावचरस्स धम्मस्स अनन्तरपच्चयेन पच्चयो – पुरिमा पुरिमा अरूपावचरा खन्धा पच्छिमानं पच्छिमानं अरूपावचरानं खन्धानं अनन्तरपच्चयेन पच्चयो. अरूपावचरो धम्मो नअरूपावचरस्स धम्मस्स अनन्तरपच्चयेन पच्चयो – अरूपावचरं चुतिचित्तं नअरूपावचरस्स उपपत्तिचित्तस्स, अरूपावचरं भवङ्गं आवज्जनाय, अरूपावचरा खन्धा नअरूपावचरस्स वुट्ठानस्स, निरोधा वुट्ठहन्तस्स नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. (२)

२८४. नअरूपावचरो धम्मो नअरूपावचरस्स धम्मस्स अनन्तरपच्चयेन पच्चयो – पुरिमा पुरिमा नअरूपावचरा खन्धा पच्छिमानं पच्छिमानं नअरूपावचरानं खन्धानं अनन्तरपच्चयेन पच्चयो; अनुलोमं गोत्रभुस्स…पे… अनुलोमं फलसमापत्तिया अनन्तरपच्चयेन पच्चयो. नअरूपावचरो धम्मो अरूपावचरस्स धम्मस्स अनन्तरपच्चयेन पच्चयो – नअरूपावचरं चुतिचित्तं अरूपावचरस्स उपपत्तिचित्तस्स अनन्तरपच्चयेन पच्चयो; नअरूपावचरा खन्धा अरूपावचरस्स वुट्ठानस्स अनन्तरपच्चयेन पच्चयो; आकासानञ्चायतनस्स परिकम्मं आकासानञ्चायतनस्स अनन्तरपच्चयेन पच्चयो; विञ्ञाणञ्चायतनस्स…पे… आकिञ्चञ्ञायतनस्स…पे… नेवसञ्ञानासञ्ञायतनस्स परिकम्मं नेवसञ्ञानासञ्ञायतनस्स अनन्तरपच्चयेन पच्चयो. (२)

समनन्तरपच्चयेन पच्चयो… सहजातपच्चयेन पच्चयो… पञ्च… अञ्ञमञ्ञपच्चयेन पच्चयो… द्वे… निस्सयपच्चयेन पच्चयो… सत्त.

उपनिस्सयपच्चयो

२८५. अरूपावचरो धम्मो अरूपावचरस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – आकासानञ्चायतनं विञ्ञाणञ्चायतनस्स उपनिस्सयपच्चयेन पच्चयो; विञ्ञाणञ्चायतनं आकिञ्चञ्ञायतनस्स…पे… आकिञ्चञ्ञायतनं नेवसञ्ञानासञ्ञायतनस्स उपनिस्सयपच्चयेन पच्चयो. अरूपावचरो धम्मो नअरूपावचरस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अरूपावचरं सद्धं उपनिस्साय दानं देति, सीलं…पे… उपोसथकम्मं करोति, नअरूपावचरं झानं उप्पादेति, विपस्सनं…पे… मग्गं…पे… अभिञ्ञं…पे… समापत्तिं उप्पादेति, मानं जप्पेति, दिट्ठिं गण्हाति; अरूपावचरं सीलं…पे… पञ्ञं उपनिस्साय दानं देति…पे… समापत्तिं उप्पादेति… मानं जप्पेति… दिट्ठिं गण्हाति; अरूपावचरा सद्धा…पे… पञ्ञा नअरूपावचराय सद्धाय…पे… पञ्ञाय… रागस्स…पे… पत्थनाय… कायिकस्स सुखस्स… कायिकस्स दुक्खस्स… मग्गस्स फलसमापत्तिया उपनिस्सयपच्चयेन पच्चयो. (२)

२८६. नअरूपावचरो धम्मो नअरूपावचरस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – नअरूपावचरं सद्धं उपनिस्साय दानं देति, सीलं…पे… उपोसथकम्मं करोति, नअरूपावचरं झानं उप्पादेति, विपस्सनं…पे… मग्गं…पे… अभिञ्ञं…पे… समापत्तिं उप्पादेति, मानं जप्पेति… दिट्ठिं गण्हाति; नअरूपावचरं सीलं…पे… पञ्ञं…पे… रागं…पे… पत्थनं…पे… कायिकं सुखं… कायिकं दुक्खं… उतुं… भोजनं… सेनासनं उपनिस्साय दानं देति…पे… समापत्तिं उप्पादेति… पाणं हनति…पे… सङ्घं भिन्दति; नअरूपावचरा सद्धा…पे… सेनासनं नअरूपावचराय सद्धाय…पे… पत्थनाय… कायिकस्स सुखस्स… कायिकस्स दुक्खस्स, मग्गस्स, फलसमापत्तिया उपनिस्सयपच्चयेन पच्चयो. (१)

नअरूपावचरो धम्मो अरूपावचरस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – आकासानञ्चायतनस्स परिकम्मं आकासानञ्चायतनस्स उपनिस्सयपच्चयेन पच्चयो…पे… नेवसञ्ञानासञ्ञायतनस्स परिकम्मं नेवसञ्ञानासञ्ञायतनस्स उपनिस्सयपच्चयेन पच्चयो. (२)

पुरेजातपच्चयादि

२८७. नअरूपावचरो धम्मो नअरूपावचरस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति, रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु नअरूपावचरानं खन्धानं पुरेजातपच्चयेन पच्चयो. नअरूपावचरो धम्मो अरूपावचरस्स धम्मस्स पुरेजातपच्चयेन पच्चयो. वत्थुपुरेजातं – वत्थु अरूपावचरानं खन्धानं पुरेजातपच्चयेन पच्चयो. (२)

पच्छाजातपच्चयेन पच्चयो… द्वे… आसेवनपच्चयेन पच्चयो… तीणि.

कम्मपच्चयो

२८८. अरूपावचरो धम्मो अरूपावचरस्स धम्मस्स कम्मपच्चयेन पच्चयो – सहजाता, नानाक्खणिका…पे…. अरूपावचरो धम्मो नअरूपावचरस्स धम्मस्स कम्मपच्चयेन पच्चयो – अरूपावचरा चेतना चित्तसमुट्ठानानं रूपानं कम्मपच्चयेन पच्चयो. (मूलं कातब्बं.) अरूपावचरा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

नअरूपावचरो धम्मो नअरूपावचरस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नअरूपावचरा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो (संखित्तं). (१)

विपाकपच्चयादि

२८९. अरूपावचरो धम्मो अरूपावचरस्स धम्मस्स विपाकपच्चयेन पच्चयो (संखित्तं).

नअरूपावचरो धम्मो नअरूपावचरस्स धम्मस्स विपाकपच्चयेन पच्चयो (संखित्तं)… आहारपच्चयेन पच्चयो… चत्तारि… इन्द्रियपच्चयेन पच्चयो… चत्तारि… झानपच्चयेन पच्चयो… चत्तारि… मग्गपच्चयेन पच्चयो… चत्तारि… सम्पयुत्तपच्चयेन पच्चयो… द्वे.

विप्पयुत्तपच्चयो

२९०. अरूपावचरो धम्मो नअरूपावचरस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

नअरूपावचरो धम्मो नअरूपावचरस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं). नअरूपावचरो धम्मो अरूपावचरस्स धम्मस्स विप्पयुत्तपच्चयेन पच्चयो. पुरेजातं – वत्थु अरूपावचरानं खन्धानं विप्पयुत्तपच्चयेन पच्चयो. (२)

अत्थिपच्चयादि

२९१. अरूपावचरो धम्मो अरूपावचरस्स धम्मस्स अत्थिपच्चयेन पच्चयो – सहजातं…पे…. अरूपावचरो धम्मो नअरूपावचरस्स धम्मस्स अत्थिपच्चयेन पच्चयो – सहजातं, पच्छाजातं…पे…. अरूपावचरो धम्मो अरूपावचरस्स च नअरूपावचरस्स च धम्मस्स अत्थिपच्चयेन पच्चयो – सहजातं (संखित्तं). (३)

नअरूपावचरो धम्मो नअरूपावचरस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). नअरूपावचरो धम्मो अरूपावचरस्स धम्मस्स अत्थिपच्चयेन पच्चयो. पुरेजातं – वत्थु अरूपावचरानं खन्धानं अत्थिपच्चयेन पच्चयो. (२)

२९२. अरूपावचरो च नअरूपावचरो च धम्मा अरूपावचरस्स धम्मस्स अत्थिपच्चयेन पच्चयो – सहजातं, पुरेजातं. सहजातो – अरूपावचरो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे…. अरूपावचरो च नअरूपावचरो च धम्मा नअरूपावचरस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – अरूपावचरा खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. पच्छाजाता – अरूपावचरा खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – अरूपावचरा खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो.